Norgga Boazosápmelaččaid Riikkasearvvi gáibádus
Historjjálaš arkiiva
Almmustahttináigodat Solberga ráđđehus
Almmustahtti: Eanandoallo- ja biebmodepartemeanta
Ođas | Almmustahtton: 16.01.2015
Norgga Boazosápmelaččaid Riikkasearvi (NBR) ovdanbijai Stáhtii Eanandoallo- ja biebmodepartemeanta bokte iežas gáibádusa doaibmajagi 2015/2016 Boazodoallošiehtadusa ođđajagimánu 12. beaivvi 2015. Gáibádusa rámma lea 126,05 milj. ruvnno, mii lea 14,55 milj. ruvnno eanet go dálá šiehtadusa rámma mii lea 111,5 milj. ruvnno.
Ekologalaš, ekonomalaš ja kultuvrralaš nanaguoddevaš boazodoallu
Iežas gáibádusas čujuha NBR daid doaimmaide maid sii oaivvildit lea deaŧalaš oažžut čađahuvvot jus galget olahit mihttomeriid dahkat boazodoalu ekologalaččat, ekonomalaččat ja kultuvrralaččat nanaguoddevažžan. Dan oktavuođas deattuhuvvo ahte boazodoallošiehtadus galgá leat reaidun dasa ahte ovdánahttit árbevirolaš boazodoalu, mas mihttomearri lea láhčit dili dahkat boazodoalu positiivvalaš ja boahtteáigásaš ealáhussan juohke guovllus riikkas.
Doarjagiid evttohit joatkit muhtin rievdadusaiguin
Goluidunnideaddji doarjagat ja njuolggodoarjagat evttohuvvojit joatkašuvvot go leat dahkan muhtin rievdadusaid ja lasihan máksomeriid. Konkrehta evttohuvvo earret eará ahte buohtalaston rekruterenossosat bálddastahttojit siidaossosiiguin doarjjaoktavuođas. Viidáseappot gáibiduvvo ahte orohatdoarjja lassána vuoi buorebut sáhttá láhčit dili dasa ahte orohagat galget sáhttit áimmahuššat iežaset ovddasvástádusa ja barggu ovdánahttit boazodoalu nanaguoddevažžan. Dasa lassin evttohuvvo bajidit buvttadandoarjaga meroštallanproseantta 35 proseanttas 40 prosentii divatgeatnegas biergovuovdimis ja eará divatgeatnegas ealáhusdietnasiin sidjiide geain leat unnit go 300 bohcco giđđaealus. Boazodoalu Ovddidanfoanda evttohuvvo lasihuvvot nannen dihte earret eará boazodoalu infrastruktuvrra ja sihkkarastit rekruterema ealáhussii. Lassin leat ovddiduvvon gáibádusat olggobeal šiehtadallamiid mat leat čadnon earret eará boazolohkoprosessii, areálahálddašeapmái, dálveorohagaid siidarájiid mearrideapmái Oarje-Finnmárkkus, boraspirehálddašeapmái, boazodoalu divadiidda, bohccuidbiepmu duolloluvvemii, ja maiddái dasa ahte sihkkarastit ja buoridit boazodoalu rámmaeavttuid Trollheimenis.
Stáhta fálaldat biddjo ovdan gaskavahkku ođđajagimánu 29. beaivvi, ja šiehtadallamat galget loahpahuvvot ovdal njukčamánu 1. beaivvi 2015.