Aktiver Javascript i din nettleser for en bedre opplevelse på regjeringen.no

Stáhtabušeahtta 2020:

NRK ruhtadeapmi rievdaduvvo

Sáddehatdivat (liseansa) jávká ođđajagimánu 1.b.2020. NRK galgá dan rájes ruhtaduvvot vearrovuogádaga bokte. Dállodoalus gos leat guokte vearromáksi šaddet máksit sullii seamma ollu go ovdal, jos sii leat divada máksán.

- Liseansarievdadusa oktavuođas lean mun atnán erenoamáš fuola das ahte okta dállodoallu mas leat guokte rávisolbmo eai galgga dárbbašit máksit eanet go maid ovdal leat máksán. Dáinna ráđđehusa bušeahttaevttohusain mas NRK ruhtadeapmi evttohuvvo,  nagodat dan vuhtiiváldit, dadjá ruhtadanministtar Siv Jensen (OvB).

Lea politihkalaš ovttamielalašvuohta das ahte liseanssa lea dárbu heaittihit dustet teknologalaš ovdáneami ja álbmoga ođđa mediadábiid. Rievdadusa mielde sihkkarastit ahte NRK oažžu dássedis ja bissovaš ruhtadeami.   

NRK galgá dál ruhtaduvvot vearrovuogádaga bokte dainna lágiin ahte persovdnageasus vuoliduvvo. Vearrolassáneapmi šaddá oktiibuot unnit go liseansasupmi. Seammás bajidat vearrogessosa pensionisttain, vai sii geat ožžot unnimuspenšuvnna eai vearuhuvvo.

- Ollugiidda lea dát rievdadus hirbmat buorre, joatká Siv Jensen. Ovdamearkka dihte sestet oktováhnemat ja oktoássit sullii 1 500 ruvnno go buohtastahttá dálá liseansamávssuin. Unnimuspensionisttat sestet sullii 3 100 ruvnno. Rievdadusas lea hui buorre sosiála profiila, dadjá ruhtadanministtar.

NRK:s galgá ain leat vuoigatvuohta geassit sisaboahtti lassiárvodivada ja ráđđehus evttoha ahte NRK juolludemiide galgá lassiárvodivat váldojuvvot mielde.    

Ođđa čovdosa lea álki hálddašit mii dagaha ahte mii eat šat dárbbaš sierra ruhtagáibidanguovddáža. Ráđđehus evttoha lasihit juolludusaid Nationálagirjerádjosa doaimmaide Muoffis buhtadussan liseansakantuvrra heaittiheami ovddas.

Bajás