Ođđa láhkaásahus nuppástuhttindoaimmaide boraspiriid geažil

Dálkkádat- ja birasdepartemeanta lea otne mearridan ođđa láhkaásahusa nuppástuhttindoaimmaide daid guovlluin gos leat erenoamáš ollu boraspiret. Ulbmil lea geahpedit sávzavahágiid ja elliid gillámušaid daid guovlluin gos leat erenoamáš ollu boraspiret. Dat lea oassi guovlluhálddašanbarggus ahte sirret boraspiriid ja sávzzaid.

2011 dohkkehii olles Stuoradiggi boraspirepolitihka gos gáibiduvvo ahte sávzabuvttadeapmi galgá heivehuvvot boraspirelohkui dehálaš boraspireguovlluin.

Áiggi mielde leat ollu sávzadoalu čađahan nuppástuhttindoaimmaid. Muhto maŋimuš jagiid eai leat doaimmaide vuoruhuvvon sierra ruđat, ja ohcamušat leat guovllus guvlui meannuduvvon iešguđet láhkai. Ođđa láhkaásahusa bokte ožžot šibiteaiggádat ortnega mii lea álkit ja diehttevaš. Ortnet lea eaktodáhtolaš ja guoská boanddaide geat guhká juo leat massán sávzzaid boraspiriide, ja geat leat čađahan eastadeaddji doaibmabijuid. 2015 lea vuoruhuvvon 7 miljovnna kruvnnu nuppástuhttindoaimmaide.

-Nuppástuhttindoaimmaid doarjjaortnet sidjiide geat háliidit álggahit ođđa doaimmaid iežaset eanadoalloeatnamiin, lea dehálaš doaibmabidju boraspirepolitihka oktavuođas.  Ollugat leat ohcalan eaktodáhtolaš ja diehttevaš ortnega mii sihkkarastá ahte ohccit meannuduvvojit seamma láhkai, ja mun lean ilus go dát ortnet dál doaibmagoahtá, cealká dálkkádat- ja birasministtar Tine Sundtoft.

Dehálaš rievdadus ovddeš ortnega ektui lea ahte Birasdirektoráhtta galgá juolludit várrejuvvon doarjjaruđaid nuppástuhttindoaimmaide, gielddaid ja fylkkamánni fágalaš cealkámušaid vuođul. Fylkkamánni galgá maid árvvoštallat doaibmabijuid boraspirenammagotti hálddašanplána vuoruhemiid ektui. Láhkaásahus mielddisbuktá ahte seammalágan juolluduseavttut gustojit buot fylkkain.   

-Nuppástuhttindoaimmat leat áigeguovdil daid guovlluin maid guovlulaš hálddašanplánat leat vuoruhan boraspireguovlun. Nuppástuhttindoarjja ásahit ođđa eanadoalloguoskevaš ealáhusdoaimmaid sáhttá muhtun oktavuođain buktit eanet diehttevašvuođa ja uhcit goluid ovdal go jahkásaš doarjja eastadandoaibmabijuide, dadjá Sundtoft. 

Láhkaásahus fápmuduvvo nu johtilit go vejolaš. Dat mearkkaša ahte buot ohcamušat mat eai leat vel loahpalaččat meannuduvvon galget meannuduvvot ođđa njuolggadusaid vuođul.