Ođđa gulahallan Norgga ja Ruoŧa gaskkas boazoguohtunkonvenšuvnna birra
Historjjálaš arkiiva
Almmustahttináigodat Solberga ráđđehus
Almmustahtti: Eanandoallo- ja biebmodepartemeanta
Ođas | Almmustahtton: 11.03.2015
Eanadoallo- ja biebmoministtar Sylvi Listhaug ja ruoŧa báikegoddeministtar Sven-Erik Bucht leaba dá gieskat deaivvadan ja ságaškuššan Norgga-Ruoŧa boazoguohtunkonvenšuvnna dili. Čoahkkimis leat ságaškuššan ja digaštallan movt ovddasguvlui bargat vai soabadit ásaheames konvenšuvnna rádjarasttildeaddji boazodoalu várás. Čoahkkimis lei ovttamielalašvuohta ahte dát bargu galgá joatkašuvvat.
Juo 2005 rájes, dalle go 1972-konvenšuvdna doaibmaáigodat luobai, de dán guovtti riikkain eai leat leamašan oktasaš njuolggadusat rádjarasttildeaddji boazodoalu várás. Norga čuovui 1972-konvenšuvnna mearrádusaid sierra lága vuođul, ja Ruoŧŧa válljii čuovvut 1751 lappekodisilla láhkamearrádusaid. Geavatlaččat lea dát mearkkašan ahte ruoŧa boazoealáhus maiddái maŋŋil 2005 lea joatkán geavaheames guovlluid mat leat Norgga bealde nu go dahke 1972-konvenšuvnna vuođul. 1972-konvenšuvnna mielde lea Norgga boazoealáhus gildojuvvon ávkkástallamis dálveguohtuneatnamiid Ruoŧa bealde.
- Dál lea áigi láddan lávket viidáset dáinna áššiin, dadjá eanandoallo- ja biebmoministtar Sylvi Listhaug. Mun miellagiddevašvuođain vuorddán fas deaivvadit mu ruoŧabeale ministtarverddiin geassemánu loahpageahčen. Danin vuorddán ahte nagodetne soahpat movt ovddasguvlui bargat áššiin, earret eará áigeplánain. Dan bargui gullá maiddái árvvoštallat daid rievdadusevttohusaid maid mii leat ožžon sámi bargojoavkkus, maid mii bijaimet áššiin bargat, dadjá Listhaug.