Lihkku sámi álbmotbeivviin!
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 06.02.2020
Odne levgejit miehtá riikka sihke Sámi ja Norgga leavggain. Dat muittuhit ahte mii juogadit oktasaš historjjá, ja ahte mii fertet ovttas váldit ovddasvástádusa boahtteáiggis.
– Lihkku sámi álbmotbeivviin!
– Munnje lea stuorra gudni beassat leat sámeministtar. Lean movtta go beasan leat mielde nannemin sámi kultuvrra ja sámegielaid. Vaikko beaivi leage ovddemustá sápmelaččaid beaivi, de ávžžuhan buohkaid searvat ávvudeapmái, dadjá guovllu- ja digitaliserenministtar Linda Hofstad Helleland.
Stuorradiggedieđáhus digitaliserema birra
Ráđđehus áigu jagi áigge ovddidit stuorradiggedieđáhusa sámepolitihka birra – man fáddán lea digitaliseren.
– Das mii ovdanbuktit buriid doaimmaid, mat leat jo álggahuvvon, ja maiguin sámegiela geavaheddjiide sihkkarastet digitála vejolašvuođaid. Mii ovdanbuktit stáhta ja gieldda hástalusaid go dat galget fállat digitála bálvalusaid sámi ássiide, ja váttisvuođaid, maid sápmelaččat vásihit digitála árgabeaivvis. Ráđđehusa ulbmil lea ahte buohkat – maiddái sámegielhállit – besset searvat digitála Norgii, dadjá Hofstad Helleland.
Sámi álbmotbeaivi ávvuduvvo dan muitun, ahte Troandimis lágiduvvui sámiid vuosttaš riikačoahkkin guovvamánu 6. beaivve 1917. Dan beaivve čalmmustahttet oktiigullevašvuođa miehtá Davvikalohta, rájáid rastá.
– Ledjen ieš mielde 100 jagi ávvudeamis Troandimis. Dat lei stuorra vásáhus, dadjá Hofstad Helleland.
Sámi álbmotbeaivvi ávvudedje vuosttaš háve 1993 ja dat šattai almmolaš leavgabeaivin Norggas 2004. Sáme leavga lea Norgga, Ruoŧa, Suoma ja Ruošša sápmelaččaid oktasaš leavga, ja lea olles sámi álbmoga oktasaš symbola.
Læhkoeh biejjine – Vuorbbe biejvijn – Lihkku beivviin – Gratulerer med dagen!
Gielda- ja ođasmahttindepartemeantta preassatelefovdna: 22 24 25 00