Aktiver Javascript i din nettleser for en bedre opplevelse på regjeringen.no

Ođđa nationála strategiijat – ovttas nannet digitála sihkkarvuođa

Ráđđehus almmuha dál ođđa strategiijaid buoridan dihte servodaga digitála sihkkarvuođa. Digitála sihkkarvuohta guoská midjiide buohkaide ja lea ge ráđđehusa váldovuoruhus.


Justiisa- ja sisafárrenministtar Tor Mikkel Wara ja servodatsihkkarvuođaministtar Ingvil Smines Tybring-Gjedde ođđa digitála sihkkarvuođastrategiijain. Govva: JD. Jos áiggut geahčadit eanet govaid almmuhandilálašvuođas, de gávnnat daid Flickris

Stáhtaministtar Erna Solberg (O), servodatsihkkarvuođaministtar Ingvil Smines Tybring-Gjedde (OvB), justiisa- ja sisafárrenministtar Tor Mikkel Wara (OvB), suodjalusministtar  Frank Bakke-Jensen (O) ja dutkan- ja alit oahpahusministtar Iselin Nybø (G) almmuhedje nationála digitála sihkkarvuođastrategiija ja nationála digitála sihkkarvuođagelbbolašvuođa strategiija almmuhankonferánssas.

– Ráđđehus vuoruha digitála sihkkarvuođa, muhto dat lea ášši maid servodat almmatge ferte ovttas čoavdit. Smávva dáhpáhusat ovtta sajis sáhttet dagahit duođalaš váikkuhusaid ollugiidda. Mii leat sorjavaččat das ahte doaimmahagat ja eiseválddit ovttasdoaibmet vai sáhttit dárbbuid guorahallat ja buoremus čovdosiid gávdnat. Dakkár ovttasdoaibman lea vuođđun strategiijas ja čuovvulanbarggus guovddážis, dadjá stáhtaministtar Erna Solberg.

 

10 dehálaš rávvaga doaimmahagaide

– Jos Norga, mii lea digitála servodat galggaš doaibmat, de lea dárbu váruhit  ahte sávakeahtes dáhpáhusat váikkuhit nu uhcán go vejolaš. Strategiijat leat stuora ávkin ja dehálaččat go  riskkaid galgat geahpedit, dadjá servodatsihkkarvuođaministtar Ingvil Smines Tybring-Gjedde.

Servodaga digitaliseren addá ollu vejolašvuođaid, muhto maiddái ođđa raššivuođaid. Ráđđehusa digitála sihkkarvuođastrategiija láhčá dili nannoseabbo ovttasbargui priváhta surggiin. Almmolaš ja priváhta doaimmahagat leat ovddidan ollu buriid evttohusaid mat strategiijabargui leat leamaš hui dehálaččat.   

– Eiseválddit leat  priváhta doaimmahagaid evttohusaid vuođul ovddidan doaibmabijuid dainna vuordámušain ahte buohkat daid čuovvulit ja geavahit vuođđun iežaset doaimmain. Strategiijaiguin háliidat nannet sihkkarvuođa olles norgga servodagas. Mis lea dárbu hukset sihkkarvuođageađgejuolggi, cealká justiisa- ja sisafárrenministtar Tor Mikkel Wara.

1,6 miljárdda kruvnnu

Strategiijas leat doaibmabijut sullii 1,6 miljárdda kruvnnu ovddas. Muhtun doaibmabijut leat juo jođus dahje galget álggahuvvot dán jagi. Ođđa strategiija deháleamos doaibmabidju lea 497 miljovnna kruvnnu sturrosaš juolludus Nationála sihkkarvuođaeiseváldái, earret eará nannet sensorneahttafierpmádaga.

– Mii vásihat oalle ollu fallehemiid ja dihtorfallehemiid olggobeale fámuin, kriminála olbmuin ja earáid bealis. Nationála sihkkarvuođaeiseváldi nannejuvvo bealle miljovnnain hukset eanet ja buoret digitála suddjen- ja alárbmarusttegiid heađuštit dihtorfallehemiid ja nannet digitála sihkkarvuođa, dadjá suodjalusministtar Frank Bakke-Jensen.

Bajás