Ođđa doarjjaortnet galgá nannet sámi mediaid ja sámegielaid
Preassadieđáhus | Nr: 25/25 | Almmustahtton: 26.05.2025 | Kultur- ja dásseárvodepartemeanta
Kultur- ja dásseárvodepartemeanta lea odne sádden gulaskuddamii ođđa láhkaásahusárvalusa sámi ođas- ja áigeguovdilismediaid doarjagiid birra.
– Mii háliidit láhčit dili dasa ahte sámi álbmogis leat ealli ja máŋggabealat mediafálaldagat. Dáinna láhkaásahusain mii nannet sorjjasmeahttun journalistihka sámi diliid birra, ja láhčit dili buorebut eambbo ođas- ja áigeguovdilissisdollui iešguđet sámegielaide, dadjá kultur- ja dásseárvoministtar Lubna Jaffery.
Ođđa láhkaásahus buhtte dálá láhkaásahusa sámi aviisadoarjaga birra, ja rahpá vejolašvuođa dasa ahte maiddái digitála mediat sáhttet oažžut doarjaga, eai ge dušše báberaviissat nu movt odne. Ođđa láhkaásahusárvalus heiveha doarjjaortnega buorebut dálá digitála mediaárgabeaivái.
Ođđa doarjjaeavttut
Ásahuvvojit ođđa eavttut dasa movt doarjja galgá meroštallojuvvot, earret eará ahte iešbuvttaduvvon áššiid ja digitála diŋgojeddjiid lohku váldojuvvo vuhtii. Sámi ođas- ja áigeguovdilismediaid buvttadandoarjja juhkkojuvvo guovtti jovkui: mediat mat buvttadit dávjá ja mediat mat eai buvttat nu dávjá, ja leat sierra doarjjaeavttut ja juogadanmodeallat goappáge jovkui.
Árvalus nanne maiddái sámegielaid geavaheami mediain. Evttohuvvo ahte galgá addojuvvot doarjja sisdollui eambbo sámegielaide go dálá ortnegis lea vejolaš, oktan sierra doarjjajoavkkuin áššiide davvisámegillii. Rahppojuvvo maiddái vejolašvuohta oažžut doarjaga áššiide bihtánsámegillii, ubmisámegillii ja nuortalašgillii, julevsámegiela ja lullisámegiela lassin. Oppalaš doarjjaoassi áššiide mat buvttaduvvojit iešguđetge sámegielaide evttohuvvo duppalastojuvvot, gitta gávcci prosentii oppalaš rámmas.
Gulaskuddanáigemearri lea borgemánu 26. beaivi 2025.