Stáhtabušeahtta 2019:
Eanet doarjja dulvviid ja uđđasiid eastadeapmái
Historjjálaš arkiiva
Almmustahttináigodat Solberga ráđđehus
Almmustahtti: Oljo- ja energiijadepartemeanta
Preassadieđáhus | Nr: 057/18 | Almmustahtton: 25.10.2018
Ráđđehus evttoha Oljo- ja energiijadepartemeantta bušeahta bokte juolludit oktiibuot 349 miljovnna ruvnnu eastadit dulvviid ja uđđasiid. Evttohuvvo maid 45 miljovnna ruvnnu sihkkarastindoaimmaide Longyearbyenis Justiisadepartemeantta bušeahta bokte.
-Ráđđehus váldá ovddasvástádusa olbmuid oadjebasvuođas ja sihkkarvuođas. Mii leat maŋimuš vihtta jagi lasihan doarjaga dulvviid ja uđđasiid sihkkarastindoaimmaide. Lean ilus go dál lasihut ruđa uđassihkkarastimii Svalbárddas, dadjá oljo- ja energiijaministtar Kjell-Børge Freiberg (OvB).
Dálkkádatrievdamat ja eanet garradálkkit dulvviiguin addet stuorit hástalusaid gávpogiidda. Ráđđehus evttoha lasihit bušeahttarámma Norgga čázádat- ja energiijadirektoráhttii (NVE) vai direktoráhtas lea vejolaš veahkehit ja bagadit suohkaniid mo čázi luoitit ja geahpedit, ja areálaplánabarggus. Ođđa regiovnnat galget maid beassat geavahit NVE uđasdieđihanvuogádaga.
-Maiddái dát čakča lea čájehan makkár hástalusat šaddet go olu arvá. Vuosttamužžan lea suohkaniid ovddasvástádus hálddašit dulvečáziid, muhto NVE sáhttá bagadallat ja addit rávvagiid. Direktoráhtii lea dát ođđa suorgi, ja dasa ferte váldit áiggi čohkket eanet vásáhusaid ja dieđuid, dadjá Freiberg.
NVE galgá addit lassi veahki suohkaniidda servodatekonomalaš eavttuid vuođul, mii servodahkii boahtá fas ávkin go dulve- ja uđasvárra geahpeduvvo.