Oktiibuot 4 miljárdda kruvnnu eanet gielddasuorgái 2017:s

Gielddasuorggi friddjaboađut lassánit gaskal 3,75 ja 4 miljárdda kruvnnu. –Dat lea dehálaš ahte gielddain lea buorre ekonomalaš rámma ja nagodit fállat buriid bálvalusaid Norgga ássiide, cealká gielda- ja ođasmahttinministtar Jan Tore Sanner.

-Ráđđehusa mihttomearri lea hukset beaktilis čálgogielddaid. 2015 leai olahusjahki, gielddaid buorre ekonomiija dáfus, ja dál mii árvalat lasihit gielddaid dietnasa vel eanet 2017:s.  Dáinna árvalusain ožžot gielddat vejolašvuođa hukset buriid bálvalusaid maid sáhttet fállat ássiid  eallindili ja eallinmuttuid ektui, dadjá Sanner. Otne son ovddida ráđđehusa jagi 2017 juolludusárvalusa gielddasuorggi várás.      

Ráđđehusa árvalus lasihit sisaboađuid addá gielddaide vejolašvuođa vuoruhit dehálaš čálgofálaldagaid nugo mánáidgárddiid, skuvllaid, mánáidsuodjalusa ja dearvvašvuođa- ja fuolahusbálvalusaid. Friddjaboađus várrejuvvo sullii 300 miljovnna kruvnnu nannet gielddalaš  gárrendikšofálaldaga.  

-Mihttomearri lea nannet gielddaid sosiála sihkkarvuođafierpmádaga, vai buohkat fuomášuvvojit ja eaige báze olggobeallái. Dan geažil vuoruhat erenoamážit gárrenvuođadoaibmabijuid, dadjá Sanner.

Gielddasuorgi ferte nannet bálvalusaid vai sáhttá čuovvut olmmošlogo lassáneami. Dienaslassáneapmi vuhtiiváldá dan ahte bálvalusdárbu gielddasuorggis dađis lassána. 

Ráđđehusas leat čielga vuordámušat dasa ahte gielddasuorgi dássedit álkida, ođasmahttá ja buorida bálvalusaid. Árvaluvvon dienaslassáneapmi addá vejolašvuođa nannet gielddalaš bálvalusaid.

Dasa lassin lea dál vejolaš beavttálmahttit resursageavaheami gielddasuorggis. Jos gielddasuorgi nagoda  geavahit beavttálmahttinvejolašvuođaid, de lea sis vejolaš lasihit gielddalaš bálvalusaid eanet go dan maid dienaslassáneapmi eaktuda.

 

Gielda- ja ođasmahttindepartemeantta preassatelefovdna: 22 24 25 00