Ola Elvestuen ođđa dálkkádat- ja birasministtar
Historjjálaš arkiiva
Almmustahttináigodat Solberga ráđđehus
Almmustahtti: Dálkkádat- ja birasdepartemeanta
Ođas | Almmustahtton: 19.01.2018
Ola Elvestuen nammaduvvui odne stádaráđis ođđa dálkkádat- ja birasministtarin. Elvestuen boahtá Stuoradikkis gosa lea válljejuvvon Oslo ovddas. Son válljejuvvui vuosttaš geardde Stuoradiggái jagis 2013. Son lea leamaš nubbinjođiheaddjin Gurut bellodagas 2008 rájes.
– Norga galgá ollašuhttit Parisšiehtadusa geatnegasvuođaid. Dat mearkkaša ruonádet servodat gos leat unnit dálkkádatgásaluoitimat. Mii áigut váldit atnui ođđa ja birasseasti energiijačovdosiid, dadjá Ola Elvestuen.
– Dálkkádat- ja birasgáhttenministtarin lea mus stuora beroštupmi buoret luonddugáhttemis. Mun illudan álgit ođđa bargui, dadjá son.
Ola Elvestuen lea riegádan golggotmánu 9.b. 1967 Vestre Totenis. Son lea bajásšaddan Einas.
Elvestuenis lea cand.mag. oahppu Oslo Universitehtas sosiálaantropologiija, stáhtadieđa ja historjá fágaiguin. Sus lea álggahuvvon váldofága historjjás ja lea čađahan jođihankuršša suodjalusa allaskuvllas, Forsvarets høgskole.
Ola Elvestuen barggai gávpotráđđin biras ja johtalussuorggis Oslos 2011-2013. Son válljejuvvui vuosttaš gearddi Oslo gávpotstivrii jagis 2013.
Son lei gávpotovdánahttinlávdegotti jođiheaddji 2003 rájes 2011 rádjái. Son lei Oslo Gurutbellodaga jođiheaddji 2000 rájes 2007 rádjái.
Stuoradikkis lea Elvestuen leamaš Energiija- ja biraslávdegotti jođiheaddji 2013 rájes.
Elvestuen lea leamaš miellahttu Stuoradikki sáttagottis Organisasjonen for sikkerhet og samarbeid i Europas (OSSEs) parlamentáralaš čoahkkimis 2013 rájes. Son lea leamaš várrelahttu Stuoradikki sáttagottis árktalaš parlamentáralaš ovttasbarggus 2017 čavčča rájes.