Stáhtabušeahtta 2021:

Opmodatvearru geahpeduvvo

Ráđđehus joatká geahpedeamis opmodatvearu bajimus máksomeari viesuin ja astoáiggeviesuin. Ráđđehus evttoha maid ahte opmodatvearru ii galgga gáibiduvvot boazodoallorusttegiin.

– Opmodatvearru dábálaš orrunviesuin sáhttá ollugiidda gártat ekonomalaš noađđin. Danne lea Solberg-ráđđehus dán ráđđehusáigodagas geahpedan opmodatvearu bajimus máksomeari sullii beliin viessoeaiggádiidda ja bartaeaiggádiidda, 7 promillas 4 promillii, cealká ruhtadanministtar Jan Tore Sanner (O).

Bajimus máksomearri orrunviesuide ja astoáiggeviesuide geahpeduvvo 5 promillas 4 promillii jagi 2021 rájes. 2020 geahpeduvvui bajimus máksomearri 7 promillas 5 promillii orrun- ja astoáiggeviesuin. Ulbmil geahpedemiin lea geahpedit opmodatvearu daid suohkaniin gos orrunviesuid ja astoáiggeviesuid opmodatvearru lea hui badjin,  ja hehttet suohkaniid gos lea vuollegis opmodatvearru gáibideames eanet go 4 promilla.

Ráđđehus evttoha ahte boazodoallu luvvejuvvo máksimis opmodatvearu, seamma láhkai go eanadoallu ja vuovdedoallu, mat máŋga jagi juo eai leat dárbbašan máksit opmodatvearu ealáhusrusttegiid ovddas.

– Boazodoalloealáhus lea ealáhus maid sáhttá sulastahttit eanadoalloealáhusain, ja mii oaivvildat ahte boazodoalus berrejit leat seammalágan opmodatvearronjuolggadusat. Boazodoallu lea ealáhus mas lea stuora mearkkašupmi ekonomiijai, bargosajiide ja kultuvrii sámi guovlluin. Mii háliidat váikkuhit dasa ahte mis lea ceavzilis boazodoallu Norggas, dadjá ruhtadanministtar Jan Tore Sanner (O).

Loga eanet Prop. 1 LS (2020-2021) Skatter, avgifter og toll 2021, kapihttal 5.