Eallindili buorideapmái ruhta Bergenis ja Troandimis

- Ráđđehus háliida leat mielde buorideamen birrasa ja báikkálaš dárbbuid erenoamáš ássansajiin Bergenis ja Troandimis. Ráđđehus evttoha dien guovtti gávpogii oktiibuot 7,5 miljovnna guovloovddideapmái  jahkái  2012, dadjala gielda- ja guovloministtar Liv Signe Navarsete.

Jagi 2012 stáhtabušeahtas evttoha ráđđehus juolludit 6 miljovnna kruvnnu guovloovddidandoaimmaide Bergenis. Dát lea duppal geardde eanet go jagi 2011. Troandin oažžu fas 1,5 miljovnna kruvnnu álggahit doaimmaid daid guovlluin gos lea heajos eallindilli.

Ráđđehus cealká Soria Moria II:s ahte ferte čuovvolit guovlluid Norggas gos ii leat nu buorre dilli. Oassi dán čuovvoleamis lea ahte vuoruhit doaimmaid Bergenis, ja ođđa doaimmaid vuoruhit Troandimis.

Doarjja galgá veahkkin buorideamen ássanbirrasa ja čoavdit ássansajiid báikkálaš hástalusaid. Earret eará galgá mieldeváikkuhit ahte buoridit čálggu ja oadjebasvuođa lagasguovlluin ja báikkálaš birrasiin. 

- Vásáhusat Groruddalen guovllu buorideamis čájehit ahte ollislaš ja guhkesáiggi návccasteapmi lea dehálaš, ja ahte gielda ja stáhta ovttasbargaba. Báikkálaččat dát mielddisbuktá beroštumi ja movtta. Mun lean erenoamáš duhtavaš go maiddái Troandimis leat dál doaimmat biddjon johtui, lohká Navarsete.

Áigodagas 2007 – 2010 lei guovloovddideapmi  Groruddalenis obbalohkái čadnon oktasaš stáhtalaš-gielddalaš ovddidandoaimmaide. Jagi 2012 evttohuvvo 40 miljovnna kruvnnu juolludit  Groruddalenii, joatkin dihtii daid buriid doaimmaid doppe. Jagi 2012 vuoruhuvvo oktiibuot 47,5 miljovnna kruvnnu guovloovddidandoaimmaide.

Gielda- ja guovlodepartemeantta preassatelefovdna: 22 24 25 00.