Historjjálaš arkiiva

Plánejit fállat boahkuid 16- ja 17-jahkásaččaide

Historjjálaš arkiiva

Almmustahttináigodat Solberga ráđđehus

Almmustahtti: Dearvvašvuođa- ja fuolahusdepartemeanta

Ráđđehus pláne fállat 16- ja 17-jahkásaččaide koronaboahku, maŋŋel go álbmot badjel 18-jagi lea ollásit boahkuhuvvon. Loahpalaš mearrádus dahkkojuvvo čakčamánu.

Álbmotdearvvašvuođainstituhtta ávžžuha ahte 16- ja 17-jahkásaččaide fállojuvvo koronaboahkku, maŋŋel go buohkat badjel 18-jagi leat ollásit boahkuhuvvon. Dasa lea dálá máhttu vuođđun. Áiggi mielde oažžut mii eanet máhtu ja vásáhusaid eará riikkain geat boahkuhit nuoraid.

– Mii háliidit diehtit eanemus lági mielde ávkki ja lassiváikkuhusaid birra ovdal go boahkuhit olbmuid vuollel 18-jagi Norggas. Ráđđehus áigu dan dihte vuordit mearridit loahpalaččat galget go 16- ja 17-jahkásaččat boahkuhuvvot dassážii go Álbmotdearvvašvuođainstituhtta lea ođđasis árvvoštallan čakčamánus, dadjá dearvvašvuođa- ja fuolahusministtar Bent Høie.

Ráhkkanahttet suohkaniid guhkidit boahkuhanprográmma
Dálá koronaboahkuhanprográmma fátmmasta olbmuid geat leat 18-jagi (jahkebuolva 2003) ja boarráset. Boahkku fállojuvvo maid olbmuide gaskkal 12- ja 18-jagi geain lea alla riska oažžut duođalaš buozanvuođa. Jus FHI ođđa árvvoštallama maŋŋel čakčamánus doalaha ávžžuhusa, de lea jáhkehahtti ahte boahkuhanprográmma boahtá fátmmastit maiddái 16- ja 17-jahkásaččaid.

FHI ođđaseamos einnostemiid mielde sáhttá dán ahkejoavkku álgit boahkuhit áramusat golggotmánus.

– Mii háliidit ráhkkanahttit suohkaniid dasa ahte boahkuhanprográmma sáhttá fátmmastit maiddái 16- ja 17-jahkásaččaid dán čavčča. Suohkanat dárbbašit áiggi plánet dán joavkku boahkuheami, ja signála ahte boahkuhanprográmma boahtá joatkit maŋŋel go álbmot badjel 18-jagi leat boahkuhuvvon, dadjá Høie.

Dál lea dušše Pfizer/BioNTech mRNA-boahkku mii lea dohkkehuvvon dán ahkejovkui.

Dábálet árgabeaivi
Lea unnán riska ahte 16–17-jahkásaččat buohccájit duođalaččat covid-19-dávddain. Gaskaboddosaš dieđut orrot maid čájeheame ahte lea unnán riska oažžut maŋŋiváikkuhusaid geahppa covid-19-dávddain. Seammás orrot FHI-dieđut čájeheame ahte 16–19-jahkásaš nuorat ožžot duođaštuvvot covid-19 dávjjit go nuorra mánát. Dat sáhttá leat dan dihte go nuorat dan agis leat eanet sosiálat ja deaivvadit eambbosiiguin go maid nuorra nuorat ja mánát dahket. Mii eat dieđe movt pandemiija boahtá ovdánit čakčat ja dálvet, eat ge movt njoammun nuoraid gaskka boahtá čuohcat skuvlajávkamii ja njoammuneastadandoaibmabijuide.

–Vaikko 16- ja 17-jahkásaččat unnán šaddet duođalaš buohccit covid-19 dihte, de sii goitge ožžot dan dávdda eanet go nuorat nuorat ja mánát, ja dán joavkkus lea leamašan stuora doaibmabidjonoađđi pandemiijas. Heajos bealit dainna ahte boahkuhit sin fertejit buohtastahttot daid ovdamuniiguin mat dan čuvvot vai sii sáhttet oažžut dábálet árgabeivviid unnán njoammuneastadandoaibmabijuiguin, dadjá Høie.