Historjjálaš arkiiva

Proposišuvdna Boazodoallošiehtadusa 2021/2022 birra ovddiduvvon Stuoradiggái

Historjjálaš arkiiva

Almmustahttináigodat Solberga ráđđehus

Almmustahtti: Eanandoallo- ja biebmodepartemeanta

Odne lea ráđđehus ovddidan proposišuvnna Boazodoallošiehtadusa 2021/2022 birra Stuoradiggái. Norgga boazosápmelaččaid riikkasearvi ja Stáhta šiehtaiga šiehtadusa guovvamánu 17. b. 2021. Boazodoallošiehtadusa rámma 2021/2022 ovddas lea 164,5 miljovnna ruvnno, mii lea 15 miljovnna eanet go dálá šiehtadus.

Proposišuvdna čájeha oppalaččat boazodoallošiehtadusa vuođu, dálá šiehtadusa, šiehtadallamiid ja Boazodoallošiehtadusa 2021/2022 sisdoalu. Proposišuvdna čilge boazodoalu ovdáneami, ja muhtin guovddáš politihkkasurggiid mat leat čadnon boazodollui.

Boazodoallošiehtadusa 2021/2022 váldovuoruheamit leat boazodoalloareálaid áimmahuššan, heahtegearggusvuohta, ja doaibmabijut áimmahuššan dihte Norgga boazodolliid geat eai beasa guođohit iežaset guohtuneatnamiin Ruoŧas. Njuolggodoarjagat boazodollui fievrriduvvojit viidásit, ja várrejupmi ja máksinmearri maid mielde rehkenastá buvttadanvuoittu maid lasihuvvojit. Boazodoalu Ovdánahttinfoandda friddja ruđat leat maid lassánan. Šiehtadallanbeliid vuoruheamit nannejit ealáhusa rámmaeavttuid mearkkašahtti olu.

Boazodoalus lea vejolašvuohta hukset mihá eanet árvvu go mii das dál lea. Bohccobierggu reidemis ja lassibuktagiin, mátkeealáhusas ja boazosápmelaččaid kultuvrra ja eallinvuogi gaskkusteamis leat stuora vejolašvuođat.
Boazodoalus lea vejolašvuohta hukset mihá eanet árvvu go mii das dál lea. Bohccobierggu reidemis ja lassibuktagiin, mátkeealáhusas ja boazosápmelaččaid kultuvrra ja eallinvuogi gaskkusteamis leat stuora vejolašvuođat. Govva: T. Gustavsen