Ráđđehus árvala 4 miljovnna sámi ealáhusaid koronadoaimmaide
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 29.01.2021
– Ráđđehus árvala juolludit 4 miljovnna kruvnno sámi ealáhusaide. Dainna sihkkarastet ealáhusdolliide einnostahttivuođa gáibideaddji áiggis, dadjá guovllu- ja digitaliserenministtar Linda Hofstad Helleland.
Virusa leavvan čuohcá sakka Sámi ealáhusaide. Ruhta ii šat jora fitnodagain nu mo ovdal ja ráđđehus háliida danin doarjut Sámi ealáhusaid gáibideaddji áigodagas. Garra njoammuneastadandoaimmat leat maid bággen ollu fitnodagaid geahpedit doaimmaid.
– Ollu fitnodagain leat ain hástalusat likviditeahtain ja máksimiin. Mávssoleamos dál, heakkaid ja dearvvašvuođa gádjuma lassin, lea sihkkarastit ahte nu ollugiin go vejolaš lea ain bargu masa máhccat, go roassu lea meattá. Lean sihkar, ahte ráđđehusa doarjagiin sáhttit arvvosmahttit ja doalahit doaimmaid váttis áigodagas, dadjá guovllu- ja digitaliserenministtar Linda Hofstad Helleland.
Sámediggi dovdá Sámi ealáhusaid bures ja hálddaša ruhtajuolludeami maiddái dán háve.
– Ráđđehussii lea mávssolaš, ahte Sámediggi oažžu ovddasvástádusa ruđaid juolludeames. Sii dovdet Sámi buoremusat – ja lean danin oadjebas dan hárrái ahte ruđain veahkehit Sámi kultur- ja ealáhusdoaimmaid ceavzit roasus, dadjá Linda Hofstad Helleland.