Ráđđehus juolluda 4 miljovnna Sámi ealáhusaide

Virusa leavvan lea čuohcan Sámi ealáhusaide máŋgga láhkai. Garra ráddjehusat, maiguin bissehit dávdda leavvamis, leat bággen ollu fitnodagaid geahpedit doaimmaideaset.

- Ollu fitnodagain leat ruhta- ja máksinváttisvuođat. Mávssoleamos dál, eallima ja dearvvašvuođa lassin, lea ahte nu ollugiin go vejolaš lea ain bargosadji gosa máhccat go roassu lea meattá. Lean danin movtta go mii sáhttit čujuhit áŋgiruššama dihto ulbmilii ja ráhkadit eanet doaimmaid Sámi ealáhusain, dadjá guovllu- ja digitaliserenministtar Linda Hofstad Helleland.

Sámediggi dovdá Sámi ealáhusaid bures ja lea danin ožžon bargun hálddašit ruđaid.

- Ráđđehussii lea mávssolaš, ahte Sámediggi oažžu ovddasvástádusa juohkit ruđaid. Sii dovdet Sámi diliid buoremusat – ja lean danin sihkar ahte ruđaiguin veahkehit Sámi kultur- ja ealáhuseallima birget dassáigo roassu nohká, dadjá Linda Hofstad Helleland.