Ráđđehus viiddida gaskaboddosaš kollektiiva suodjalanortnega ukrainalaš báhtareddjiide

Dát sisdoallu lea eanet go 1 jagi boaris.

Ráđđehus viiddida gaskaboddosaš kollektiiva suodjalanortnega Ukrainas báhtui bággehallan olbmuide. Dál addojuvvo maid kollektiiva suodji daid Ukraina stáhtaborgáriidda geat orro Norggas guovvamánu 24.beaivve 2022.

Ráđđehus ásahii njukčamánu 11.beaivve ortnega, man mielde Ukrainas báhtui bággehallan olbmot sáhttet oažžut kollektiiva suoji Norggas. Ortnegii gullet Ukraina stáhtaborgárat geat bággehallojuvvojedje báhtarit guovvamánu 24.beaivve ja dan maŋŋil dán jagi. Ortnegii gullet maid goalmmát riikkaid borgárat ja sii geat eai gula mange stáhtii.  

– Studeanttat ja áigodatbargit galget maid beassat ohcat gaskaboddosaš kollektiiva suoji Norggas. Suodji addojuvvo álkiduvvon meannudeami vuođul, seamma láhkai go eará ukrainalaččaide geat ohcet suoji Norggas. Dat addá sidjiide vejolašvuođa joatkit oahpuset ja bargguset almmá guhkes ja áddjás áššemeannudeami, dadjá justiisa- ja gearggusvuođaministtar Emilie Enger Mehl.

Ollu ukrainalaččat ledje juo ožžon orrunlobi Norggas go soahti buollái Ukrainas, ja sin orrunáigodat lea dál nohkamin. Mii háliidat lágidit dilálašvuođa beaktilis áššemeannudeapmái, ovttadássásaš meannudeapmái ja dasa ahte buohkat galget oažžut vejolašvuođa bargat ja studeret go bohtet Norgii, ja dan geažil lea ráđđehus odne mearridan fátmmastit eambbogiid dán ortnegii.  Rievdadus mearkkaša ahte maiddái sii geat orro Norggas ovdal guovvamánu 24.beaivve sáhttet oažžut gaskaboddosaš kollektiiva suoji. Eaktuduvvo ahte ohcci  orrunáigodat lea nohkan, dahje nohká maŋimusat guokte mánu maŋŋil go ohcamuš oažžut suodjaleami ovddiduvvo.