Ráđđehus árvala 20 miljovnna lasi bohccuid heahtefuođđarii

Dát sisdoallu lea eanet go 1 jagi boaris. Danne sáhttet dieđut leat boarásmuvvan.

Ráđđehus háliida veahkehit badjealbmáid ereliiggán váttis dilis, ja maid láhčit elliide ja boahttevaš buvttadeapmái buoret dili, ja lea dan geažil odne árvalan Stuorradiggái lasihit 20 miljovnna kruvnno roassogearggusvuođafondii, masa juolludit ruđa boazodoallošiehtadusa bokte.

- Finnmárkku boazodoalus lea ereliiggán váttis dilli. Danin lea ereliiggán mávssolaš ahte dál láhčit dili fuođđariid oastimiid, ja ahte daid fievrridit elliide nu johtilit go vejolaš. Ráđđehus árvala dál juolludit 20 miljovnna kruvnno lasi roassogearggusvuođafondii, dadjá eanandoallo- ja biebmoministtar Olaug Bollestad (KrÁ).

Stáhtaráđđi lea čuvvon guohtunroasu dárkilit dálvvi ja giđđadálvvi. Dilli lea geažos áiggi mannan heajut ja heajut guvlui. Bohccuide lea šaddan ain váddásut gávdnat biepmu. Boazodoalloeiseválddiid maŋimuš raporttaid vuođul roassu sáhttá bistit gitta cuoŋo-/miessemánu molsašupmái.

Jikŋon guohtumat

Guohtunroassu čuohcá stuorra osiide boazodoalus. Roasu sivvan lea valjis muohta ja jikŋon guohtumat, maid geažil boazu ii oaččo doarvái biepmu lunddolaš guohtumiin. 2020/2021 boazodoallošiehtadusa šiehtadallamiin lasihedje boazodoalu roassogearggusvuođafondii 10 miljovnna kruvnno guohtonroasu geažil. Roassu lea ain bistimin, ja roassogearggusvuođafoanddas lea ohccojuvvon eanet ruhta, go foanddas lea.

- Ádden bures, ahte badjealbmáin lea lossa áigi, sihke fysihkalaččat ja psyhkalaččat. Jos eat bija johtui doaimmaid, ollu eallit soitet jápmit nealgái. Dan lassin, ahte dat čuohcá elliid čálgui, de dat bidjá badjealbmáid ereliiggán váttis ruđalaš dillái, dadjá Bollestad. 

Sámi badjedilli lea sihke boaittobealeguovlluid ealáhus, mas ollugat barget iehčanas ealáhusdoallin boazodoalus, ja lea maid kulturguoddi ealáhus, mainna barget sápmelaččat, geat leat álgoálbmot.

- Mii čuovvut dárkilit man guvlui boazoguohtunroassu jorggiha, ja gulahallat čavga ealáhusain. Boazodoallu lea hui mávssolaš sápmelaččaide, ja lean movtta das ahte ráđđehus bidjá johtui ođđa doaimmaid dán váttis dilis, dadje guovllu ja digitaliserenministtar Linda Hofstad Helleland (O).

Tamrein.
Ráđđehus árvala 20 miljovnna lasi bohccuid heahtefuođđarii. Govva: Eanadoallo- ja biebmodepartemeanta