Ráđđehus vuolida gáibádusaid valáštallandoaimmaid searvamii

- Ráđđehus háliida váikkuhit dasa ahte ekonomiija ii heađuš mánáid ja nuoraid searvamis valáštallan-  ja fysalaš doaimmaide, ja vuoruha golbma iešguđet lágan doaibmabiju vuolidan dihtii searvangáibádusaid. Mii vuoruhat báikkálaš joavkkuid ja servviid go lasihat sidjiide doaibmaruđaid 40 proseanttain, ortnegii “Searvvadeaddji valáštallansearvvit” lasihat 4 ođđa gávpoga, ja lasihat ruhtadoarjaga 25 proseanttain mánáid ja nuoraid olgodoaimmaid  vuosttašceahkkefálaldagaide, cealká kulturministtar Thorhild Widvey.

Báikkálaš joavkkut ja searvvit mat jođihit mánáid ja nuoraid valáštallamiid ja fysalaš doaimmaid ožžot dál 13 proseantta spealloruđain valáštallandoaimmaid várás, ovdal ožžo 11,25 proseantta. Oktiibuot ožžot sii 294 miljovnna kruvnnu 2015:s, lassáneapmi lea 85 miljovnna kruvnnu jagi 2014 ektui. Báikkálaš valáštallanráđit juogadit ruđaid iežaset gielddain.

- Buoridanplána ulbmil leai valáštallanulbmiliidda lasihit spealloruhtadoarjaga 12,5 proseanttain, muhto mii leat dál nagodan loktet doarjaga 13 proseanttain. Lassáneapmi dahká ahte šaddá álkit gávdnat buoret ja hálbbit eahpebyrokráhtalaš báikkálaš čovdosiid, nu ahte  buot mánát ja nuorat sáhttet searvat beroškeahttá váhnemiid ekonomalaš hástalusain, dadjá Widvey.

Ráđđehus lasiha ortnegii “Searvvadeaddji valáštallansearvvit”  njeallje ođđa gávpoga

Searvvadeaddji valáštallanservviid doarjjaortnet lassána 2 miljovnnain, 13.5 miljovdnii jagi 2016.

- Lassi doarjja valáštallanservviid searvvadeaddjidoaimmaide mielddisbuktá ahte njeallje ođđa gávpoga besset ortnegii mielde. Dat dahká ahte eanet mánát ja nuorat sáhttet searvat beroškeahttá váhnemiid ekonomalaš váttisvuođain, ja eanet nieiddat ja bártnit geain lea unnitloguduogáš ožžot dál vejolašvuođa searvat organiserejuvvon valáštallandoaimmaide, dadjá kulturministtar.

25 proseantta doarjjalassáneapmi mánáid ja nuoraid olgodoaimmaide

20 miljovnna kruvnnu lea juolluduvvon mánáid ja nuoraid olgodoaimmaide. Dat lea 4,1 miljovnna kruvnnu eanet go jagi 2014.

- Olgodoaimmat mat jođihuvvojit leat eanaš hálbbes vuosttašceahkkefálaldagat, ja muhtumat leat nuvttá. Doarjjalassáneapmi mielddisbuktá ahte eanet mánát ja nuorat besset Olgodoaibmajagis searvat olgodoaimmaide, loahpaha Widvey.