Aktiver Javascript i din nettleser for en bedre opplevelse på regjeringen.no

Boazodoallu ja koronavirus (Covid-19)

Koronavirus dahje njoammu geahpesdávda ii galgga hehttet Norgga beale boazodolliid guođoheamis bohccuid Ruoŧa bealde ja Norgga-Ruoŧa rádjaguovllus. Norgga beale boazodolliin, geat guođohit bohccuid Ruoŧa bealde lea lohpi rasttildit  Ruoŧa riikkarájá ja sii eai šatta ruovttukarantenii go bohtet Norgii. Ráddjemat ja dieđut njoammudávdda birra ođasmahttojuvvojit ja heivehuvvojit dađis, ja jos ođđa doaibmabijuide šaddá dárbu eastadit njoammudávdda leavvama.

Váráiduhttinsihkkarvuohta servodagas lea dál erenoamáš rašši. Dat guoská maid vuođđoealáhusaid buvttadeddjiide, nugo boazodolliide.

Fylkkamánnit leat Eanadoallo- ja biebmoministara gohččuma mielde čohkken dieđuid  man ollu boazodoallit guođohit bohccuideaset Ruoŧas ja man guovllus sii guođohit.     

Dieđut čájehit ahte leat ollu orohagat mat dál guođohit bohccuideaset Ruoŧa bealde dahje rádjaguovllus. Boazodolliin lea lohpi rasttildit Ruoŧarájá ja sii eai šatta karantenii go bohtet fas Norgii. Boazodoallit galget nu bures go vejolaš doallat gaskka ja ráddjet oktavuođa eará olbmuiguin. Dat mearkkaša ahte gaska eará olbmuide galgá unnimusat 2 mehtera  oktavuođain guhkit go 15 minuhta, ja njuolgga fysalaš oktavuođaid berre garvit.  Karantena- dahje errennjuolggadusat gustojit juohkehažžii gii buohccá, dahje jos balahuvvo ahte koronavirus lea njommon.   

– Lea hirbmat dehálaš ahte boazodoallit barget buot maid sáhttet eastadit koronavirusa leavvamis. Dál šaddá dárbu hálddašit doaibmabijuid eastadit koronavirusa njoammuma lassin dan ahte hálddašit váttis guohtundili ja ealátroasu eanaš boazodoalloguovlluin Norggas. Lea dehálaš ahte boazodoallit bissot dearvvasin vai mii ovttas nagodat hálddašit ja dustet duođalaš roasuid maid dál vásihat, cealká stáhtaráđđi Olaug Bollestad.

Badjeolbmot vásihat masttademiid nuppi riikka bohccuiguin. Maiddai siiddaid gaskka. Rátkkašemiid galggašii garvit nu guhkás go vejolaš ja rátkimat galget čielggaduvvot fylkkamánniin. 

Boazobarggu ja guođohemiid oktavuođas sáhttá geavahit barttaid mat leat čielga guođohanbarttat ja mat leat namuhuvvon orohagaid doallonjuolggadusain. Barttaid sáhttet dušše boazodoallit geavahit geat leat boazobarggus.

Ii leat lohpi doalvut bohccuid Supmii. Jos bohccot rasttildit riikkarájá, de dat galgá hálddašuvvot ja čielggaduvvot Norgga-Suoma boazoáidekonvenšuvnna bokte.

Biebmobearráigeahčču árvvoštallá dán duođalaš dili dađis amas koronavirus ii čuoze ja šatta váralaš elliid dearvvašvuhtii. Eallit Norggas eai njoammut dávddaid olbmuide. Eanet dieđut leat Biebmobearráigeahču neahttabáikkis. 

Ávkkálaš liŋkkat:

Bajás