Historjjálaš arkiiva

Ovtta oaivilis ođđa boazodoallošiehtadusa hárrái

Historjjálaš arkiiva

Almmustahttináigodat Solberga ráđđehus

Almmustahtti: Eanandoallo- ja biebmodepartemeanta

Norgga Boazosápmelaččaid Riikkasearvi (NBR) ja Stáhta sohpe guovvamánu 18. beaivve ođđa boazodoallošiehtadusa áigodahkii 01.07.2014 – 30.06.2015. Soahpamuš mielddisbuktá boazodoalloealáhussii oktiibuot 111,5 miljovnna kruvnno ruhtadoarjaga. Dat lea 2,0 miljovnna kruvnno eanet, go dálá boazodoallošiehtadusas.

Norgga Boazosápmelaččaid Riikkasearvi (NBR) ja Stáhta sohpe guovvamánu 18. beaivve ođđa boazodoallošiehtadusa áigodahkii 01.07.2014 – 30.06.2015. Soahpamuš mielddisbuktá boazodoalloealáhussii oktiibuot 111,5 miljovnna kruvnno ruhtadoarjaga. Dat lea 2,0 miljovnna kruvnno eanet, go dálá boazodoallošiehtadusas.

2014/2015 boazodoallošiehtadusa váldoulbmil lea ovddidit boazodoalloealáhusa rationála ealáhussan, mii doaibmá márkaniid vuođul ja mii lea nanus guhkes áiggi perspektiivvas.

2014/2015 boazodoallošiehtadus lea seammá áigodagas, go dan golmma jagi áigodaga maŋimuš jahki, maid Boazodoallostivra lea mearridan boazologu geahpedeapmái. Dan oktavuođas oasálaččat oidnet mávssolažžan doalahit dálá doarjjaortnega váldosárgosiid, nu ahte njuolggodoarjagat leat ain čadnojuvvon buvttadeami árvui. Dat ovddida oasálaččaid mielas stáđisvuođa ja einnostahttivuođa boazodoallošiehtadusa ortnegiidda. Seammás 2014/2015 boazodoallošiehtadusa olis leat álkidahttán njuolggadusaid ja ortnegiid. Earret eará heaittihuvvojit muhtin ortnegat ja muhtin doarjagiidda eai šat várrejuvvo sierra ruđat.

Boazologu heiveheapmi eaktuda, ahte njuvvet eanet bohccuid. Dan vuođul leat šiehtadusa osolaččat oaidnán mávssolažžan, ahte 2014/2015 boazodoallošiehtadusas vuoruhit erenoamážit doaimmaid, mat lasihit njuovvamiid ja bohccobierggu vuovdima. Dan oktavuođas lea mávssolaš buohtalastit boazodoallošiehtadusa doarjjaruđaid, nu ahte beaktileamos lági mielde olahit mearriduvvon ulbmiliid.

Boazodoalu infrastruktuvra nannejuvvo ja boazodolliid movttiidahttet njuovvat eanet dan bokte, ahte lasihit erenoamážit buvttadandoarjagiid. Seammás joatkašuvvá bohccobierggu márkanlávdegotti bargu, maiguin ovddidit buriid márkaniid bohccobierggu várás.

Boazodoalu guohtumiid áigot sihkkarastit doaibmabijuin ja mávssolaš reaidduin, maid ovddidit pilohtaprošeavtta olis. Áigumuš lea ráhkadit digitála kártareaiddu, mii čalmmustahttá ja addá ollislaš gova iešguđet boazodoalloorohagain čađahuvvon huksendoaimmain.

- Šiehtadallamiin ovddiduvvon soahpamuša vuođul sáhttá dinet eanet dan bokte, ahte njuovvá eanet, ja ovddida eanet árvoráhkadeami ovttaskas boazodoalli guovdu. Seammás šiehtadallojuvvon soahpamuš nanne ođđa rávnnjáldaga, man mielde boazodoalu oidnet eanet ealáhussan go ovdal, ja dilli láhččojuvvo daid boazodolliide, geain lea boazodoallu váldoealáhussan. Šiehtadallojuvvon soahpamuša duogážin lea ollislašvuođa jurdda, man vuođul lea vejolaš oažžut positiiva ovdáneami, nu ahte ovttaskas boazodoalli dine eanet, eanandoallo- ja biebmoministtar Sylvi Listhaug dadjala.

Norgga Boazosápmelaččaid Riikkasearvi (NBR) ja Stáhta sohpe ođđa boazodoallošiehtadusa áigodahkii 01.07.2014 – 30.06.2015. Stáhta bealis šiehtadusaid jođihii Anne Mari Glosli ja Norgga Boazodoallosápmelaččaid Riikkasearvvi (NBR) bealis fas jođiheaddji Nils Henrik Sara. (Govva: LMD) Deaddil gova, de oainnát dan stuorábun.