Ruđat gumpedoaimmaide
Historjjálaš arkiiva
Almmustahttináigodat Solberga ráđđehus
Almmustahtti: Dálkkádat- ja birasdepartemeanta
Ođas | Almmustahtton: 12.10.2017 | Maŋimuš ođasmahttojuvvon: 18.10.2017
Ráđđehus áigu juolludit sullii 27 miljovnna ruvnno doarjaga suohkaniidda gumpeguovlluin, gumppiid merkemii ja nannet Stáhta luonddubearráigeahču riidoeastadanbarggu.
- Ulbmil dáid doaimmaiguin lea geahpidit riidduid gumppe oktavuođas. Dát guoská earenoamážit olbmuide geat ellet gumpeguovlluin gos leat beassebirradagat ja siidjiide geat vásihit noađđin orrut gumpeguovllus, dadjá dálkkádat- ja birasministtar Vidar Helgesen.
Ruđat suohkaniidda gos leat gumppiid orrunbirradagat
Ráđđehus ásahii 2017:s sierra doarjjaortnega suohkaniidda gos leat gumppiid beassebirradagat Hedemárkkus, Akershusas ja Østfoldas. Dáid ruđat sáhttá atnit doarjjan vissis ealáhusberoštumiide, bálvalusfálaldagaide dahje ealáhusovdáneapmái. Lea suohkaniid duohken mearridit doarjjajuohkima. 20 miljovdna ruvdnosaš ortnet jotkojuvvo 2018 stáhtabušeahtas.
Gumppiid merken
Maŋemus dálvvi merkejuvvojedje gumpeguovlluin 15 gumppe GPS-čeabetbáttiin. Merkemii lea várrejuvvon 4,1 miljovnna ruvdno vai prošeakta sáhttá jotkojuvvot boahtte dálvvi maid. Merken addá dieđuid das mot gumppet láhttejit ássanguovlluin ja mot dat vádjolit. Dát addá buoret vuođu dađistaga árvvoštallat vejolaš vahágiid šibihiidda ja bohccuide, ja gumppe láhttenvuogi olbmuid ektui.
SLB (SNO) nannen
3,3 miljovdna ruvdno lea várrejuvvon lasihit Stáhta luonddubearráigeahču (SLB) kapasitehta čuovvulit vejolaš vahágiid maid gumppet dahket ja gumppiid mat bohtet beare lahka olbmuid, ja bargui eastadit riidduid ja gaskkustit máhtu. Lea dehálaš nannet Stáhta luonddubearráigeahču vai sihkkarastá buori gumpečuovvoleami ja vai giehtaguššá riidduid buoremus lági mielde.