Čorget nuoskkiduvvon mearrabotni Bergenis

Ráđđehus árvala boahtte jagi stáhtabušeahtas 58 miljovnna kruvnnu čorget mearrabotni mii lea nuoskkiduvvon birasváralaš ávdnasiiguin Puddefjorden vuonas Bergenis.

- Sundvolden-julggáštusas lohpidii ráđđehus vuoruhit birasváralaš ávdnasiid čorgendoaimmaid nuoskiduvvon guovlluin. Dál mii ollašuhttit lohpádusaid. Mearrabotnibiras Bergen guovllus šaddá ollu buoret ja riska birasváralaš ávdnasiid leavvamii maid unniduvvo. Gávpotvuona čorgen mearkkaša hui ollu olgodaddaneallimii, vuojadeapmái ja astoáiggeguolásteapmái, seammás go lagasguovllut šaddet bivnnuheappot huksensuorgái, cealká dálkkádat- ja birasministtar Tine Sundtoft.  

Čorgendoaimmat álggahuvvojit jagi 2016 ja doaivumis barggut leat čađahuvvon 2017:s. Stáhta máksá oktiibuot 116 miljovnna kruvnnu, sullii 75 proseantta goluin. Bergen gielda máksá eanašoasi reasta goluin.

Ráđđehusa mielas čatnasit Puddefjorden barggut vuohkkasit Ruovdemáđiidoaimmahaga tuneallabohkanbargguide Ulrikenis. Mássaid maid vižžet tuneallas sáhttet geavahit gokčat nuoskkiduvvon mearrabotni Puddefjorden vuonas.

-Mii seastit sihke ruđaid ja fievrrideami go ovttastahttit bargguid, ja addá vejolašvuođa buorebut ávkkástallat mássaid tuneallas, dadjá Sundtoft.

Troandin hámmana čorgenbarggut leat bures boahtán johtui, ja gárvvistuvvojit 2016:s.