Historjjálaš arkiiva

Sáhkavuorru Márkomeannu 2017

Historjjálaš arkiiva

Almmustahttináigodat Solberga ráđđehus

Almmustahtti: Gielda- ja ođasmahttindepartemeanta

Buorre eahket buohkaide! Buorit olbmot! Festiválaoassálastit! Lea somá go fas beasan leat dáppe Márkomeanus, ja almmuhit ođđa sámi ofelaččaid.

Sii geat dán skuvlajagi galget bargat ofelažžan leat:

  • Anne-Marja Kristine Jannok-Joma,  Snåase
  • Dan-Jonas M. Danielsen Sparrok,  Snåase
  • Leif Henrik Halvari, Deatnu
  • Maren Benedicte Storslett, Guovdageaidnu

Giittán Márkomeanu lágideddjiid go beassat leat dáppe festiválas! Márkomeannu lea sihke festivála ja deaivvadanbáiki, erenoamážit nuoraide. Dan dihte lean ge hui ilus  go beasan dáppe almmuhit sámi ofelaččaid.

Ledjen dáppe guokte jagi dassá, ja ferten dadjat dán jagi maid – mun anán árvvus Márkomeannu-festivála, ja lean hirpmástuvvan man bures dii lehpet bargan dáinna festiválain!

Dán guovllus leat ollugat geat háliidit oahppat sihke mearrasámi ja márkosámi kultuvrra birra. Lean ovdal galledan Várdobáikki sámi guovddáža, ja lean oaidnán movt guovddáš organisere ja lágida doaimmaid báikkálaš árbevieruid birra mat leat čatnon lundui, kultuvrii ja gillii.   

Jurdda sámi ofelašortnegiin lea ahte sámi nuorat galget gaskkustit iežaset árgabeaimáhtu njuolgga gulahallamiin eará nuoraiguin. Mu mielas lea hui buorre go sis geat galget johtit ofelažžan, lea iešguđetlágan duogáš, ja ahte bohtet iešguđet guovllus Sámis. Mun oainnán ahte nu leage maiddái din njealjásis geat lehpet válljejuvvon ođđa ofelažžan.  

Dál lea hui guovddážis leat sápmelažžan, soaitá eanet go goassige ovdal! Dii ofelaččat šaddabehtet viidát johtit ja ovddastit sámi servodaga ja sámi nuoraid olles skuvlajagi, ja hállat iežadet vuolggasajis ja vásáhusaid vuođul. Buohkat geat leat ožžon gažaldaga nu go: “Manne don gis háliidat leat sápmelažžan?” dihtet ahte dan ii leat nu álki vástidit. Sáhttá leat hui gáibideaddji gaskkustit dieđuid sámi servodaga birra. 

Lea dehálaš ahte dii geat lehpet ofelaččat, dievasmahttibehtet nubbi nuppi go bargabehtet joavkun – ja ovddidehpet buorre bargovuoiŋŋa ja ovttasbarggu dán doaimmas. 

Háliidan giitit Sámi allaskuvlla dan barggu ovddas maid dii bargabehtet hálddašit ja organiseret ofelašortnega. Dieđán man vuđolaččat dii bargabehtet gávdnat olbmuid geain lea gelbbolašvuohta ja návccat ovttasbargat, ja man áŋgirit dii jođihehpet ofelašortnega miehtá skuvlajagi.

Háliidan maid giitit sin geat heitet sámi ofelažžan; Maja-Sofie Larsen Fjellstrõm, Knut Mikkel Hætta, Oda Kjær Eriksen ja Ole Nicklas Mienna Guttorm. Ollu giitu barggu ovddas. Leai hui somá din deaivat go galledeiddet departemeantta dálvit. Doaivvun ahte ofelašdoaibma lea addán buriid vásáhusaid, ja ahte dat lea movttiidahttán dahkat rivttes mearrádusaid viidáset eallimis.

Sávan ođđa ofelaččaide lihkku bargguin. Dieđán ahte dii šaddabehtet bargat ollu, muhto dii oažžubehtet maid ollu ruovttoluotta!

Sávan ahte dii oažžubehtet ovtta jagi sámi ofelažžan mii dahká ahte oahppabehtet ollu ja ahte šaddá gelddolaš ja suohtas jahki!