Aktiver Javascript i din nettleser for en bedre opplevelse på regjeringen.no

Sámi nuorat vuite riikkaidgaskasaš biebmogirjebálkkašumi

– álgoálbmogiid árbevierut seailluhuvvojit ja fievrreduvvojit viidáseappot go nuorra kulturguoddit čájehit beroštumi ja rámisvuođa iežaset kultuvrra dáfus. Biebmogirjji bures ánssášuvvon gudnemearka lokte ovdan deaŧalaš prošeavtta, dadjá gielda- ja ođasmahttinministtar Monica Mæland.

Biebmogirji EALLU oaččui odne riikkaidgaskasaš ja árvofámolaš bálkkašumi Gourmand Awards kategoriijas 'Best Food Book of the Year in all categories', ja 'Arctic'.

Bálkkašupmi gohčoduvvon biebmogirjjiid Oscar, mas girječállit miehtá máilmmi gilvalit iešguđet bálkkašumiin.

Biebmogirjji EALLU lea boađus álgoálbmotprošeavttas maid Árktalaš ráđđi lea dorjon, go Norga vuolggahii ášši. Riikkaidgaskasaš boazodoalloguovddáš (ICR) lea jođihan prošeavtta, gos sámi nuorat Norggas leat oassálastán biebmovieruiguin boazodoallokultuvrras.

Biebmogirji lea álgoálbmotnuoraid, dálkkádatrievdamiid ja biebmoárbevieruid birra, ja bidjá deattu árbevieruid rolla báikkálaš ealáhatovdáneamis. Girjjis leat 30 biebmoneavvaga.

Sátni EALLU lea vižžon boazodoalus ja lea čadnon sátnái EALLIN.

EALLU lei nominerejuvvon váldobálkkašupmái Jagi biebmogirji, lassin kategoriijai Árktalaš, Guoddevaš eallinláhki ja Árbevirolašbiebmu, ja vuittii 'Best Food Book of the Year in all categories', ja 'Arctic'.

Girjjit eambbo go 200 riikkain

Bálkkašupmi juhkkojuvvui stuora doaluin Yantai-gávpogis, Kinas. Girjjit badjel 200 riikkain oassálaste gilvvus, gos sámi nuorat EALLU-prošeavttas čájehedje iežaset biebmokultuvrra ja deaivvadedje álgoálbmotnuoraiguin eará riikkain juogadit vásáhusaid.

–  EALLU lea ovdavázzi prošeakta dan dihte go dat suokkarda álgoálbmogiid árbevieruid nuoraid geahččanguovllus. Nuorat oidnet árbevieruid viidáset fievrredeami ođđaáiggi hástalusaid ektui, nugo dálkkádatrievdamiid. Dan dihte lea prošeakta áigeguovdil ja deaŧalaš, dadjá Monica Mæland.

5 eará biebmogirjji Norggas leat nominerejuvvon, earret eará guokte girjji maid Trond Moi ja Henry Notaker leaba čállán.

Bajás