Soahpan 123,1 milj. kruvdnasaš ođđa boazodoallošiehtadusa

– Leat leamaš garra šiehtadallamat, ja mun lean ilus go dál leat soahpan ođđa boazodoallošiehtadusa, dadjá Eanadoallo- ja biebmoministtar Jon Georg Dale. 

2018/2019 boazodoallošiehtadus fievrrida prinsihpaid Dieđ. St. nr. 32 Reindrift. Lang tradisjon – unike muligheter. Dat lea mielde nannemin boazoealáhusa ekologalaš ceavzilvuođa. Lassánan ruhtageavaheapmi mearkkaša earret eará ahte doarjjaortnegat mat nannejit buvttadeami ja gálvojođu, leat vuoruhuvvon, ja ahte leat láhčán dili daid boazoeaiggádiidda geain boazodoallu lea váldoealáhussan. 

– Lean hirbmat duhtavaš go šiehtadusbealit leat soahpan vuoruhit lasihit doaibmadoarjjaortnega nuoraide, dadjá Eanandoallo- ja biebmoministtar. Dát galgá movttiidahttit nuoraid bargagoahtit boazodoalus. Ealáhus dárbbaša čeahpes, nuorra boazodolliid geat aktiivvalaččat servet beaivválaš bargui, dadjá Dale. 

• Boazodoallošiehtadus – suoidnemánu 1. b. 2018 – geassemánu 30. b. 2019 (pdf)
• Boazodoallošiehtadusa 2018 šiehtadallamiid loahppaprotokolla (pdf)

Šiehtadusbealit leat maiddái šiehttan sakka lasihit doarjaga orohagaide. Oassi das galgá várrejuvvot orohagaid bargui vuoruhit HMS. 

– Boazodoalloealáhusas leat olu duođalaš lihkohisvuođat ja lea dárbu nannet HMS-barggu ealáhusas. Dál veahkeha stáhta ekonomalaččat, ja ealáhus ferte čájehit ahte sii aktiivvalaččat barget geahpedit lihkohisvuođaloguid, dadjá Dale. 

Orohatruđa lassáneapmi galgá maiddái doarjut barggu ovdánahttit ealáhusa ceavzilis ealáhussan ja nannet gearggusvuođa elliidčálggu hárrái go lea goavvejahki. 

– Dáinna šiehtadusain lea láhččojuvvon dilli boazoealáhusa positiivvalaš ovdáneapmái go lasiha sisaboahtovejolašvuođaid, sihke biergobuvttadeamis ja lassiealáhusain. Lea maiddái dárbbašlaš vuoruhit gearggusvuođa, erenoamážit goavvejagiid geažil maŋimuš jagiid, dadjá Anne Marie Glosli, guhte lea Stáhta šiehtadallanjođiheaddji.