Politiijagiddagasaid lokaliseren ii leat mearriduvvon

Mearrádus buot politiijagiddagasaid lokaliserema birra dan 12 ođđa politiijaguovllus ii dahkko ovdalgo gávdno vuđolaš, ollislaš ja bures jurddašuvvon mearridanvuođđu.

– Mun deattuhan ahte čielggadanbargu lea jođus olles politiija-Norggas giddagashámádaga birra, ja mearrádusat eai dahkko eaige boađe dahkkot ovdal mis lea ollislaš bajilgovva, dadjá justiisa- ja gearggusvuođaministtar Per-Willy Amundsen.

Lagaspolitiijaođastusa ulbmiliin lea okta ahte politiija galgá addit buoret ja eambbo ollislaš bálvaluskvalitehta olles riikkas. Vai politiijaguovllut galget addit buoret bálvaluskvalitehta ja ávkkástallat kapasitehta buoremus lági mielde, de lea dehálaš árvvoštallat movt politiijaresurssat hálddašuvvojit, maiddái giddagasaid bargoveaga ceggema dáfus.

Giddagasstruktuvrra barggus lea dehálaš sihkkarastit dohkálaš giddagasdoaimma nationála gáibádusaid ektui – bargu mii boahtá dahkkot čavčča mielde. POD ovddasvástádus lea, lagas gulahallamis politiijaguovlluiguin, sihkkarastit dássedettolaš ja ollislaš čovdosa. Báikkálaš politiijameasttir dahká loahpalaš mearrádusa giddagasaid lokaliserema birra maŋŋelgo bargu lea čađahuvvon.