Aktiver Javascript i din nettleser for en bedre opplevelse på regjeringen.no

Sihkkarastán guokte sorjjasmeahttun lohkanvuogi válggaid oktavuođas

Gielda- ja ođasmahttindepartemeanta lea odne mearridan ahte buot suohkanat galget jienastanlihpuid lohkat manuálalaččat go čađahit gaskaboddosaš lohkama. – Dat sihkkarastá ahte mii oažžut guokte sorjjasmeahttun lohkama, ja ahte válgabohtosat šaddet riekta, dadjá gielda- ja ođasmahttinministtar Monica Mæland.

Válggaid oktavuođas lea oadjebasvuohta ja luohttevašvuohta hirbmat dehálaš. Jienasteaddjit galget leat oadjebasat das ahte válgabohtosat leat riekta, ja ahte sin válgajienat váikkuhit Stuoradikki, fylkkadikki ja gielddastivrraid čoahkkádussii. Dat lea vealtameahttun min demokratiijai. 

Departemeanta oaivvilda ahte min válgavuogádat lea buorre ja bures sihkkarastojuvvon, muhto háliida nannet sihkkarvuođa vel eanet ođđa láhkaásahusa bokte mii gáibida čađahit gaskaboddosaš lohkama dainna lágiin ahte jienastanlihput lohkkojuvvojit manuálalaččat. Ollu suohkanat čađahit juo manuálalaš lohkama. 

– Dat lohkanvuohki ahte skánnet jienastanlihpuid lea sihkkar. Muhto midjiide lea dehálaš  ahte jienasteddjiin lea luohttevašvuohta min válgavuogádahkii. Ođđa láhkaásahusa vuođul oažžut mii guokte sorjjasmeahttun lohkama. Dáinna doaibmabijuin mii nannet luohttevašvuođa válgavuogádahkii, dadjá Mæland.

Departemeanta lea ovttas Válgadirektoráhtain ráhkadan nevvodangihpa láhkaásahussii. Dat čilge mo manuálalaš lohkan galgá čađahuvvot, ja rutiinnaid dasa mo suohkanat sáhttet čađahit dárkkistemiid lohkama oktavuođas.  

Láhkaásahusas leat maiddái eará rievdadusat mearriduvvon, earret eará njuolggadusat dasa mo suohkanstivra- ja fylkkadiggeválggaid jienastanlihput galget hábmejuvvot, dan sivas go dál leat ollugat geat šaddet jienastit eanet áirasiid suohkanstivrii ja fylkkadiggái go ovdal, mii mielddisbuktá ahte jienastanlihpuid lea dárbu rievdadit.   

 

Gielda- ja ođasmahttindepartemeantta preassatelefovdna: 22 24 25 00

Bajás