Sihkkarvuohta nannejuvvo válgačađaheamis
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 01.09.2017
- Min válgavuogádat lea bures iskojuvvon ja sihkkarastojuvvon. Mii háliidat eastadit spekulašuvnnaid ja eahpesihkkarvuođa válgabohtosiid hárrái. Válggaid oktavuođas lea oadjebasvuohta ja luohttevašvuohta hirbmat dehálaš. Dan geažil čavget mii sihkkarvuođa vel eanet, cealká gielda- ja ođasmahttinministtar Jan Tore Sanner. Gielda- ja ođasmahttinministtar bivdá dál buot suohkaniid unnimusat oktii čađahit manuálalaš lohkama stuoradiggeválgga jienaid lohkamis. Dan lassin nannejuvvo sihkkarvuohta dihtorvuogádagain.
Nationala sihkkarvuođaeiseváldi (NSM) ja Politiija sihkkarvuođabálvalus (PST) leat ovttas Válgadirektoráhtain oktilaččat čađahan riska- ja rašesvuođaárvvoštallamiid stuoradiggeválgga ja válgačađaheami oktavuođas.
Ii leat mihkkige mii čujuha dasa ahte gii nu háliidivčče heađuštit válgačađaheami. Almmatge leat doaimmat ja beroštupmi lassánan dađistaga, maiddai internationála dásis, muhtun teknihkalaš čovdosiidda. Dat iešalddis mielddisbuktá stuorit riskka.
- Válgačađaheamis lea oadjebasvuohta ja luohttevašvuohta mearrideaddjin. Mii eat galgga leat beare luohttevaččat ja válgačađaheamis ii galgga mihkkige eahpádusaid sihkkarvuhtii. Jienasteaddjit galget leat oadjebasat das ahte válgabohtosat Norggas leat riekta. Ođđa árvvoštallamat áitagiid birra, mat leat čađahuvvon ovttas NSM:n ja PST:n, dahket dárbbašlažžan lasihit eanet sihkkarvuođadoaimmaid válgačađaheamis, dadjá Sanner.
Ođđa láhkaásahus gáibida suohkaniid čađahit gaskaboddosaš lohkama dainna lágiin ahte jienastanlihput lohkkojuvvojit manuálalaččat. Sullii bealli suohkaniin čađahit juo manuálalaš lohkama, ja dát rievdadusat eai váikkut daidda. Eará suohkaniidda rievdadusat mielddisbuktet lassi barggu.
Válgačađaheapmi Norggas čađahuvvo dávjjimusat suohkaniin. Sihkkarastin dihte rivttes lohkama, lohkkojuvvojit buot jienat sihke suohkanis ja fylkkasuohkanis. Jienastanlihput vurkejuvvojit go lohkan lea loahpahuvvon. Dainna lágiin lea vejolaš dárkkistit jos šaddá eahpádus dasa ahte leat go jienat riekta lohkkojuvvon.
Válgadirektoráhtas lea válggaid oktavuođas leamaš lagas ovttasbargu PST:n ja NSM:n das mo eastadit dáhpáhusaid, álggahit sihkkarvuođadoaimmaid ja válgačađaheami hárjehallamis. Válgadirektoráhtta áigu vel čađahit dárbbašlaš teknihkadárkilastimiid ja rutiidnarievdadusaid nannen dihte sihkkarvuođa vel eanet.
- Válgadirektoráhtta áigu ain čuovvulit suohkaniid ja fylkkasuohkaniid ja leat veahkkin bagadallandoaimmain ja eará doaimmain gos dárbbašit veahki ovdal válggaid, dadjá Bjørn Berg Válgadirektoráhtas.
Gielda- ja ođasmahttindepartemeantta preassatelefovdna: 22 24 25 00