Sihkkel-MM Bergen oažžu 21 miljovnna kruvnnu dán jagi

Ráđđehus evttoha reviderejuvvon nationálabušeahtas juolludit 21 miljovnna kruvnnu plánet ja ráhkkanit sihkkel-MM doaluide Bergenis 2017. Dat lea stuoradikki mearrádusa mielde mii addá Kulturdepartementii válddi šiehtadit sihkkel-MM lágideddjiiguin ahte stáhta gokčá goluid 30 miljovnna kruvnnu rádjai. Reastasupmi galgá meannuduvvot jagi 2017 stáhtabušeahta oktavuođas.

-Bergen ja Norga áiguba čakčat 2017 lágidit sihkkel-MM mii čađahuvvo doaresbealluottain. Dat lea stuora riikkaidgaskasaš dáhpáhus mas miljovnnaid mielde olbmot beroštit miehta máilmmi. 21 miljovnna sturrosaš juolludus dán jagi sihkkarastá máilmmimeašttirgilvvu lihkostuvvama. Doarjja galgá geavahuvvot buoridit ja sihkkarastit luottaid ja oktasašjohtalusa heivehallandoaimmaid, cealká kulturministtar Linda Hofstad Helleland.

-Sihkkelastin lea valáštallanvuohki mii geasuha olles álbmoga. Mii sáhttit čevllohallat árvvolaš sihkkelvaláštalliid dáfus, ja sihkkelvaláštallamis leat mis buorit ovddasteaddjit ja ollugat háliidit ollet bajimužžii. Mun illudan vásihit gelddolaš gilvvuid mat movttiidahttet ja čalmmustahttet Norgga, dadjá kulturministtar.