Aktiver Javascript i din nettleser for en bedre opplevelse på regjeringen.no

Soahpan Boazodoallošiehtadusa 2020/2021

Stáhta, Eanadoallo- ja biebmodepartemeanta ja Norgga Boazosápmelaččaid Riikkasearvi (NBR) leat soahpan boazodoallošiehtadusa 2020/2021. Šiehtadusa rámma lea 149,5 miljovnna kruvnnu. Lassáneapmi lea 13,4 miljovnna kruvnnu diimmá šiehtadusa ektui.

– Lean duhtavaš go dál leat soahpan boazodoallošiehtadusa 2020/2021 Norgga Boazosápmelaččaid Riikkaservviin, cealká eanadoallo- ja biebmoministtar Olaug Bollestad.

– Dat lea oppalohkái buorre šiehtadus, go dat joatká daid doaimmaid mat leat juo jođus. Šiehtadus vuoruha sin geain boazodoallu lea váldoealáhus. Boazodoallogeasus loktejuvvo  jagi 2021 rájes, mii sihkkarastá buriid rámmaeavttuid dán dehálaš ealáhussii, dadjá Olaug Bollestad

Boazodoallošiehtadusas jotkojuvvojit njuolggodoarjagat. Buvttadanbálkkašumi máksomearit ja várrejumit leat bajiduvvon. Šiehtadanbeliid vuoruheamit mearkkašit ahte ealáhusa rámmaeavttut nannejuvvojit.

Norgga Boazosápmelaččaid Riikkasearvi (NBR) ja Stáhta leat soahpan ođđa boazodoallošiehtadusa jahkái 2020/2021. Stáhta šiehtadallanjođiheaddji Anne Mari Glosli (gurut bealde) ja NBR jođiheaddji Ellinor Marita Jåma vuolláičállimin ođđa šiehtadusa.
Norgga Boazosápmelaččaid Riikkasearvi (NBR) ja Stáhta leat soahpan ođđa boazodoallošiehtadusa jahkái 2020/2021. Stáhta šiehtadallanjođiheaddji Anne Mari Glosli (gurut bealde) ja NBR jođiheaddji Ellinor Marita Jåma vuolláičállimin ođđa šiehtadusa. Govva: Eanadoallo- ja biebmodepartemeanta

Guohtundilli lea hui duođalaš       

Šiehtadanbealit leat šiehtadallamiid oktavuođas ollu ságastallan ealátroasu birra maid boazodoallu dál vásiha. Eanaš boazodoalloguovlluin Norggas lea ealátroassu.  Šiehtadanbealit leat ovttaoaivilis ahte dilli lea duođalaš, ja danne leatge nannen heahtegearggusvuođafoandda 10 miljovnna kruvnnuin gustovaš šiehtadusas (2019/2020). Ruđat galget geavahuvvot oastit fuođđariid. Šiehtadanbealit leat maid heahtegearggusvuođafondii várren 3 miljovnna kruvnnu Boazodoallošiehtadusas 2020/2021, sihkkarastin dihte ahte foandda nagoda dustet sullasaš dili boahttevuođas.  

- Mun lean dárkilit čuvvon mielde mo guohtundilli lea boazodoalloguovlluin, ja lean ilus go  sáhttit veahkehit boazoeaiggádiid geat dál vásihit váttis guohtundili, dadjá eanadoallo- ja biebmoministtar Olaug Bollestad. 

Dálveguohtumat Ruoŧas

3,2 miljovnna kruvnnu leat várrejuvvon doaibmabijuide daid boazoeaiggádiid várás geat eai beasa geavahit dálveguohtumiid Ruoŧas, dan sivas go boazoguohtunkonvenšuvdna Norgga ja Ruoŧa gaskkas ii leat vel sajis

Boazodoallogeasus

Vearut ja divadat eai leat oassin boazodoallošiehtadusa rámmas, muhto šiehtadallamiid oktavuođas lea ruhtadanministtar dovddahan ahte boazodoallogeasus galgá jagi 2021 rájes bajiduvvot seamma dássái go eanadoallogeasus. Ráđđehus áigu dasto árvvoštallat ovddidit evttohusa ahte rievdadit opmodatvearrolága jagi 2020 mielde, vai boazodoallu luvvejuvvo máksimis opmodatvearu, seamma go eanadoallu ja vuovdedoallu, vrd. Opmodatvearrolága § 5h. 

Luopmu ja astoáigi

Šiehtadallanbealit leat soahpan sihkkarastit boazoeaiggádiidda luopmo- ja astoáiggevejolašvuođaid. Danne lasihat orohatdoarjaga 4,4 miljovnna kruvnnuin, ja ortnet rievdaduvvo vai orohagat sáhttet gokčat goluid sadjásažžii go boazoeaiggát lea luomus.  

Lassiealáhusat

Šiehtadallanbealit leat soahpan joatkit boazoeaiggádiid vejolašvuođaid oažžut doarjagiid lassiealáhusaide guoski ovdánahttinprošeavttaide. Oahppo- ja fuolahanbálvalusat nannejuvvojit, ja 3,5 miljovnna kruvnnu várrejuvvo ortnegii. Ovdánahttinprográmma jotkojuvvo, muhto das deattuhuvvo ahte boazodoallovuđot mátkeealáhus galgá ovddiduvvot boazodolliid eavttuid vuođul.

Bajás