Spiehkastat errengáibádusas, go leat boahkuhuvvon

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Olbmot, geat leat guktii boahkuhuvvon, eai dárbbaš šat leat njoammunerremis. Sii, geat leat oktii boahkuhuvvon, ja lea vássán unnimustá golbma ja eanemustá 12 vahkku dan rájes go boahkuhuvvojedje, eai maid dárbbaš leat njoammunerremis, jos sii válddihit iskosa áramustá goalmmát jándora ja maŋimustá čihččet jándora dan maŋŋá, go navdet iežaset leamaš oktavuođas muhtumiin, geasa dávda lea njommon. Rievdadusat bohtet fápmui gaskaija, maŋŋebárgga miessemánu 4. beaivve čuovganeapmái.

Nu mearriduvvui ávžžuhusaid vuođul, maid ráđđehus lea ožžon Dearvvašvuođadirektoráhtas ja Álbmotdearvvašvuođainstituhtas.

– Badjel 1,3 miljovnna norgalačča leat dál boahkuhuvvon unnimustá oktii korona vuostá. Lea hui buorre ođas, go sii eai šat dárbbaš leat njoammunerremis. Dat geahpeda máŋgasiid árgabeaivvi, dadjá dearvvašvuođa- ja fuolahanministtar Bent Høie.

Guktii boahkuhuvvon olbmot eai dál šat dárbbaš leat njoammunerremis, nu mo eai maiddái sii, geain lea leamaš covid-19 maŋimuš guđa mánus. Sii, geat leat guktii boahkuhuvvon, eai maid dárbbaš válddihit iskosiid, vaikko leat leamaš lagaš oktavuođas olbmuin, geas lea dávda.

Lea jo ovddežis mearriduvvon, ahte olbmot geat leat boahkuhuvvon dahje geain lea leamaš covid-19 maŋimuš guđa mánus, eai dárbbaš leat nu gohčoduvvon vuordinerremis.

Go leat boahkuhuvvon easkka oktii
Sii, geat leat boahkuhuvvon vuosttaš háve unnimustá golbma ja eanemustá 12 vahku dassá, eai maid dárbbaš leat njoammunerremis, jos sii leat válddihan PCR-iskosa unnimustá 3 ja eanemustá 7 jándora dan maŋŋá, go leat maŋimustá leamaš lagaš oktavuođas dainna, geasa dávda lea njommon. Dat geat eai hálit dahje eai sáhte válddihit iskosa, fertejit leat njoammunerremis.

– Lea mávssolaš, ahte dat geat galget boahkuhuvvot guktii, ožžot nuppiid boahkuid rievttes áigge, vai ožžot ollislaš suodjaleami, ja nu doalahit stáhtusa, ahte leat boahkuhuvvon, dadjá Høie.

Eat rievdat njuolggadusaid, maid mielde olbmot fertejit erremii, go bohtet riikii, vaikko sii leat boahkuhuvvon. Dan leat easkka árvvoštallamin.

Sáhttet luohpat erremis
Boahkuhuvvon olbmot, geat leat njoammunerremis, go mearrádus boahtá fápmui, sáhttet luohpat erremis, jos vuosttaš boahkuheames lea vássán eanet go golbma vahku. Dat geat leat boahkuhuvvon dušše oktii, fertejit válddihit PCR-iskosa áramustá 3 ja maŋimustá 7 jándora lagaš oktavuođa maŋŋá, jos sii áigot luohpat erremis.

Guktii boahkuhuvvon olbmot eai dárbbaš válddihit iskosa, go luhpet erremis.

Njoammunerren
Go duođaštuvvo, ahte muhtumii lea njommon covid-19, de fertejit buohkat, geat leat leamaš suinna lagaš oktavuođas, leat erremis dihto áiggi dan rájes go sii leat leamaš oktavuođas. Jos don leat leamaš lagaš oktavuođas, de bargit, geat leat guorramin njoammumiid, váldet duinna oktavuođa ja muitalit makkár njuolggadusat gustojit.

Loga helsenorge.no -neahttasiiddus njoammunerrema njuolggadusaid.