Stáhta fállá boazodollui 117,5 milj. ruvnnu 2018/2019 boazodoallošiehtadusas

Stáhta šiehtadallanlávdegoddi lea odne ovddidan Norgga Boazosápmelaččaid Riikasearvái (NBR) fálaldaga boazodoallošiehtadallamiidda. Jagi 2017 geavakeahtes ruhtasirdimiin šaddá ekonomalaš rámma seamma stuoris go dálá šiehtadusas. Stáhta šiehtadallanlávdegoddi evttoha 117,5 miljovnna ruvnnu 2018/2019 boazodoallošiehtadussii.

Fálaldat mii ovddiduvvo čuovvu Stuoradikki dieđáhusa nr. 32 Boazodoallu. Guhkes árbevierru – erenoamáš vejolašvuođat, ja dat mielddisbuktá ahte doarjjaortnegat mat ealáhusas nannejit biergobuvttadeami ja biergojođu vuoruhuvvojit ja ahte doaibmabijut heivehuvvojit boazoeaiggádiidda geain boazodoallu lea váldoealáhus. Fálaldat čuovvu daid cealkámušaid maid ealáhuslávdegoddi ollislaččat lea ovddidan jahkásaš boazodoallošiehtadallamiin njeallje maŋimuš jagi. Dán jagáš boazodoallošiehtadusas leat deattuhan dárbbu lasihit doaibmadoarjaga nuoraide, movttiidahttit sin válljet boazodoalu. Go bidjat eanet návccaid ovddidit bálvalusaid ja buktagiid mat lunddolaččat gullet boazodollui, omd. go várret ruđaid oahppan- ja fuolahusvuđot bálvalusaide, de láhčit dili eanet árvoháhkamii ja bearašboazodoalu ovdáneapmái.  

Maŋimuš dálvi leai gáibideaddji earret eará go guohtumat ledje lássahuvvon, ja dan geažil stáhta šiehtadallanlávdegoddi evttoha boazodoalu gearggusvuođadoaimmaide lasihit 2 milj. ruvnnu.  

Boazodoallu.
Boazodoallu. Govva: Tom Gustavsen/Bohccobierggu márkanlávdegoddi

Ođđa klassifiserenvuogádat boazodollui mearriduvvui čakčat 2015. Vuogádat galgá bálkkašit buriid njuovvanbohccuid, mii movttiidahtášii boazoeaiggádiid eanet buvttadit juohke bohcco ovddas. Stáhta šiehtadallanlávdegoddi háliida joatkit vuogádaga, ja maiddái geavahišgoahtit optihkalaš mihtidanvuogi bohccuide. 

Heargi geassá reaga.
Heargi geassá reaga. Govva: Tom Gustavsen/Bohccobierggu márkanlávdegoddi

- Dáinna fálaldagain láhčit boazoealáhussii buorre ovdáneami vai dienasvejolašvuođat lassánit, sihke biergobuvttadeamis ja lassiealáhusain. Lea maid dehálaš ja dárbbašlaš buoridit gearggusvuođadoaimmaid, erenoamážit go jurddaša makkár hástalusat dán suorggis leamaš  maŋimuš jagiid, dadjá Anne Marie Glosli, gii lea Stáhta šiehtadallanjođiheaddji.  

Boazosápmelaš
Boazosápmelaš Govva: Tom Gustavsen/Bohccobierggu márkanlávdegoddi