Stáhtabušeahtta:
Stáhta ja Norgga Girku earu ollašuhttin
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 93/16 | Almmustahtton: 06.10.2016 | Maŋimuš ođasmahttojuvvon: 14.10.2016
Ođđajagimánu 1.b. 2017 šaddá Norgga Girku sierra riektesubjeaktan, sirrejuvvon stáhtas. Stáhtagirkoortnet nugo mii leat dovdan dan reformašuvnna rájes 1536:s, heaittihuvvo. Dát mearkkaša ahte Norgga girku oažžu rievttálaš iešheanalašvuođa, ja ahte báhpat eai šat bargga Gonagasa ovddas.
- Lean ilus go mii dál sáhttit loahpahit stáhta ja girku earu. Dát lea dehálaš dáhpáhus girku historjjás. Proseassas lea leamaš govda politihkalaš ja girkolaš ovttaoaivilvuohta. Ekonomalaš rámmaid geažil maid Norgga Girku oažžu go šaddá iešheanalažžan, lean oadjebas dasa ahte girku bisuha iežas barggu riikaviidosaš álbmotgirkun, dadjá kulturministtar Linda Hofstad Helleland.
Stáhta juolludeamit Norgga Girkui addojuvvojit 2017 rájes oppalaš rámmadoarjjan man Girkočoahkkin hálde. Rámmadoarjjaevttohus lea 1,9 miljárdda kruvnna, mii lea sullii seamma dásis go 2016:s. 22 miljovnna kruvnna leat nuppástusruhta sirrenproseassa oktavuođas. Dasa lassin evttohuvvo ahte Norgga Girku oažžu 100 miljovnna kruvdnasaš iežaskapitáladoarjaga.
Norgga Girku oažžu 2017 rájes iešheanalaš ovddasvástádusa iežas ekonomiijas. Ođastus lea 2012 vuođđoláhkarievdadusaid váikkuhus, go mearrádusat stáhta konfešuvdnačanastumiin evangelisttalaš-lutheralaš ohppui ja Gonagassii girkostivran gomihuvvojedje.