Stáhtaministtar lea almmuhan luohpanohcamuša

Finánsasártni maŋŋá Stuoradikkis otne ovdalgaskabeaivvi bivddii stáhtaministtar Jens Stoltenberg sáni almmuhit ahte su ráđđehus ohcá luohpat sierračoahkkimis stáhtaráđis Šloahtas otne dii. 13.00.

Stáhtaministara ohcamuš sánis sátnái:

“Presideanta,

Stuoradiggeválggaid čakčamánu 9.beaivve bohtosiid geažil ja go šiehtadus dahkkui gaskal Gurutbellodaga, Kristtalaš álbmotbellodaga, Ovddádusbellodaga ja Olgešbellodaga, lea dál parlamentáralaš vuođđu cegget ođđa ráđđehusa mas leat mielde Olgešbellodat ja Ovddádusbellodat.

Mun áiggun de Ráđđehusa ovddas ovddidit luohpanohcamuša stáhtaráđis otne.

Mun háliidan rávvet Gonagaslaš Majestehta mannat Olgešbellodaga jođiheaddji, Erna Solberg lusa, go son lea Olgešbellodaga ja Ovddádusbellodaga stáhtaministtarevttohas ja mat leaba gergosat ovttas cegget ráđđehusa”.

Doaimmaheaddjái:

Dii. 14.00 otne lágida stáhtaministtar preassakonfereanssa luohpanohcamuša birra, Ráđđehusa guossevistti preassalanjas. Preassa ferte čájehit preassakoartta ja legitimašuvnna ja beassá boahtit dii. 13.00 rájes Riddervolds gate 2 čujuhussii.

Preassadeaivvadeapmi ii lágiduvvo Šloahttašiljus stáhtaráđi čoahkkima maŋŋá otne. Dat lágiduvvo ráđđehusa molsuma oktavuođas.

Ráđđehusa molsuma birra bohtet lagabui dieđut sierra preassadieđáhusa bokte.

Preassaoktavuohta: Gulahallanhoavda Trude Måseide, mátketlf. 957 26 510.