Stuoradiggedieđáhus sámi gielaid, kultuvrra ja servodateallima birra
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 21.06.2019
− Ráđđehus almmuha odne stuoradiggedieđáhusa sámi gielaid, kultuvrra ja servodateallima birra – boahtteáigái ráhkkaneaddji dieđáhus sámepolitihka birra. Sávvamis dieđáhus lohkkojuvvo ja divaštallojuvvo, ja ahte mii oažžut ollu buriid oaiviliid mo sámepolitihka galggašii ovddidit boahttevaš jagiid, dadjá gielda- ja ođasmahttinministtar Monica Mæland.
Dieđáhus válddahallá sámi gielaid, kultuvrra ja servodateallima ovdánahttindovdomearkkaid ja hástalusaid, ja bálvalusfálaldagaid sámi álbmoga várás.
Giella lea váldofáddá stuoradiggedieđáhusas. Dieđáhusas boahtá ovdan ahte stuorámus hástalusat leat čadnon dasa ahte leat uhcán sámegielgeavaheaddjit ja go lea váttis háhkat sámegielat bargiid skuvlii, dearvvašvuođaásahusaide ja eará dehálaš servodatsurggiide. Ráđđehus áigu joatkit áŋgiruššat sámegielaid ovdii boahttevaš jagiid.
Sámedikki árvvoštallamat leat vuhtiiváldojuvvon dieđáhusas
Lea vuosttas geardde ahte ráđđehus ovddida stuoradiggedieđáhusa mas Sámedikki árvvoštallamat leat mielde. Sámediggi ja ráđđehus leat eanasmuddui ovttaoaivilis dieđáhusa dillečilgehusa ja hástalusaid dáfus. Dakko gokko lea sierramielalašvuohta Sámedikki ja ráđđehusa oaiviliid gaskka, ja go Sámediggi lea háliidan ovddidit iehčanas politihka Stuoradiggái, de čilgejuvvojit dat sierra teakstaosiin.
-Sámediggi lea iežas árvodási ja rolla geažil ráđđehusa deháleamos eaktudeaddji sámepolitihkas. Stuoradiggedieđáhusa čállit ovttasráđiid Sámedikkiin lea midjiide ođđa vásáhus ja mii leat oahppan ollu. Dál mii áigut vuđolaččat árvvoštallat mo ovttasbargu lea doaibman vai bargoproseassa šaddá vel buoret boahttevaš jagiid, dadjá gielda- ja ođasmahttinministtar Monica Mæland.