Aktiver Javascript i din nettleser for en bedre opplevelse på regjeringen.no

Stuorra buhtadusortnet kultuvrii, eaktodáhtolaš suorgái ja valáštallamii

Dát sisdoallu lea eanet go 6 mánu boaris. Danne sáhttet dieđut leat boarásmuvvan. Ođasmahttojuvvon dieđuid oainnát dás Corona-dilli.

– Dilli lea gáibideaddji kultur-, eaktodáhtolaš- ja valáštallansuorggis, go sihke fitnodagat, doaimmat, joavkkut, searvvit ja ovttaskas olbmot leat vásihan ahte oassi dahje buot boađut leat jávkan goasii ija badjel. Ráđđehus áigu dahkat maid sáhttá vai dilli buorrána, ja lean movtta go beasan ovdanbuktit fámolaš doaimmaid, dadjá kultur- ja dásseárvoministtar Abid Q. Raja.

Abid Q. Raja
Govva: Marius Bakke/Kulturdepartemeanta

Doaibmačoahkki, maid odne ovdanbuktet, sisdoallá kulturealáhusa buhtadusortnega, mii buhtada sullii 300 miljovnna kruvnno, ja vástideaddji doaimmaid valáštallamii ja eará eaktodáhtolaš doaimmaide, mii buhtada sullii 600 miljovnna kruvnno. Ortnegiin buhtadit bileahtaid vuovdima ja oassálastinmávssuid jávkama, ja lassigoluid dan oktavuođas go doaluid fertejit šluhttet dahje maŋidit koronavirusa geažil.

– Lean hui duhtavaš, go ráđđehus nagoda ovdanbuktit ereliiggán buori buhtadusortnega kultur-, eaktodáhtolaš- ja valáštallansuorgái, dadjá kultur- ja dásseárvoministtar.

– Ovttas doaimmaiguin, maid dássážii leat ovdanbuktán, ahte ráđđehus ii gáibit ruovttoluotta doarjagiid, maid leat juolludan kultur- ja eaktodáhtolaš doaimmaide, ulbmillaš buhtadus luođobargiide ja iehčanas ealáhusdoalliide golmma maŋimuš jagi dietnasa vuođul, ja dan oktavuođas sosiálaveahkki vuosttaš 17 beaivvi, dasa lassin ahte stáhta máksá stuorámus oasi rehkegis bággoluomuid oktavuođas, de mii leat ásahan buori doaibmačoahki dán suorgái. Nu mii dál ásahit viiddis ortnega, mii lea ávkin hui ollu aktevrraide.

– Mii gulahallat dattetge ain organisašuvnnaiguin, servviiguin, fitnodagaiguin ja doaimmaiguin, ja árvvoštallat dađistaga lassidoaimmaid. Áigodat gáibida ollu olles suorggis, muhto ráđđehus lea cealkán ahte mii bargat maid mii sáhttit vai gádjut bargosajiid, ja dasa dát ortnet lea buorre doarjja, loahpaha kultur- ja dásseárvoministtar.

Ortnegiid hálddašit Kulturráđđi ja vuorbádan- ja vuođđudusgeahčču (Lotteri- og stiftelsestilsynet), goabbáge ortnega teknihkalaš čovdosat leat vuorbádan- ja vuođđudusgeahčus. Álggus ortnega olis buhtadit doaluid goluid, maid livčče lágidan njukčamánu 5. beaivvis cuoŋománu lohppii.