Nannejit barggu NAV boasttumáksimiid vuostá

Ráđđehus evttoha 30 miljovnna kruvnna doaibmabijuide geahpedit Bargo- ja čálgoetáhta (NAV) boasttumáksimiid reviderejuvvon nationálabušeahtas.

– Vaikko boasttumáksimiid oassi lea unni, de čájehit guorahallamat ahte boasttumáksimat oppalaččat dagahit stuorra supmiid juohke jagi. Sihkkarastit rivttes ruđa rivttes olbmui lea dehálaš doalahan dihtii luohttámuša čálgoortnegiidda, dadjá bargo- ja sosiálaministtar Anniken Hauglie. 

Bargo- ja čálgoetáhta lea departemeantta gohččuma vuođul ráhkadan doaibmaplána boasttumáksimiid vuostá. Plána galgá nannet barggu geahpedit boasttumáksimiid, beroškeahttá leaš go etáhta ieš meaddán dahje geavaheaddji ieš lea leamaš fuollameahttun dahje iešdáhtolaš dahje guođđán dagakeahttá. Evttohuvvon lassijuolludeamit sihkkarastet dan ahte Bargo- ja čálgoetáhta sáhttá jođánit álggahit vuoruhuvvon doaibmabijuid plánas. 

Nannen dagaha ahte eanet boasttumáksimiid sáhttá fuomášit ja gáibidit ruovttoluotta, ja ahte unnit gáibádusat boarásmuvvet. Nannen maiddái dagaha ahte jotkkolaš boasttumáksimiid sáhttá fuomášit árat, vai boasttumáksimat šaddet unnit go muđui. Dáinna seastá Bargo- ja čálgoetáhta, ja dat álkidahttá ovttaskasolbmui ruovttoluottamáksima.

Nannen galgá belohahkii ovdánahttit ođđa dárkkistanmetodaid ja belohahkii doaibmabijuid mat addet stuorát áššemeannudankapasitehta.