Lasihat juolludusa oččodit eanebuid bargat ja searvat doaimmaide

Ráđđehus lasiha juolludusa vai eambbogiid oažžu bargui, ja árvala 1 000 ođđa doaibmasaji, 30 miljovnna kruvnnu nuoraiddoaimmaide, 60 miljovnna kruvnnu nuoraide geat ožžot sosiálaveahki ja leat geatnegahttojuvvon searvat doaimmaide ja 13 miljovnna kruvnnu doaimmaide vai sisafárrejeaddjit geain lea jearahuvvon gelbbolašvuohta, johtilit servet bargomárkanii.

– Ráđđehusa bušeahta bokte vuoruhat eanet doaimmaid ja bargguid, ja olbmuide buoret čálggu ja oadjebas árgabeaivvi.  Árvaluvvon doaibmabijuid bokte  galggašii dat vejolaš, cealká bargo- ja sosiálaministtar Anniken Hauglie. 

Árvaluvvon 1 000 ođđa doaibmasaji mearkkašit ahte Ráđđehus lasiha juolludusa jagi 2016 salderejuvvon bušeahta ektui, ja nu bisuha Reviderejuvvon nationálabušeahta lasáhusa.   

Doaibmabidjodássi olbmuide geain leat vuoliduvvon bargonávccat joatkašuvvá.

2017:s vuoruhuvvojit doaibmabijut mat gusket nuoraide ja sisafárrejeddjiide geat bohtet riikkain EES-guovllu olggobealde. Dasto vuoruhuvvojit doaibmabijut mat gusket bargguhis olbmuide Mátta-Norggas ja Vestlánddas. 

Áŋgiruššet eanet bargguhis nuoraid ovdii

Ráđđehus árvala lasihit juolludusa bargguhis nuoraid várás 30 miljovnna kruvnnuin. Nuoraidáŋgiruššan gusto olles riikii, muhto álggos vuoruhuvvojit fylkkat Mátta-Norggas ja Vestlánddas gos bargguhisvuohta lea eanemusat lassánan.  

– Ulbmilin lea árrat álggahit bargoguvllot čuovvoleami, movttiidahttit ohcat bargguid ja johtilit beassat bargoeallimii dahje váldit oahpu. Lea dehálaš ahte nuorat eai boađe dan dillái ahte šaddet guhká barggu haga, dadjá bargo- ja sosiálaministtar Anniken Hauglie.

Mii vuoruhat vuollel 30 jahkásaš bargoohcciid ja olbmuid geain leat vuoliduvvon bargonávccat, ja jos gávcci vahku leamaš barggu haga ja ii ge leat ožžon barggu, oahppofálaldaga dahje eará fálaldaga. Doaibmabidju boahtá dálá 3 garantiijaortnega sadjái mii lea nuoraid várás. Dat mielddisbuktá čavgasat čuovvoleami Bargo- ja čálgoetáhta bealis ja garrasit gáibádusaid bargomárkandoaibmabijuid geavaheapmái. 

Nuorat geat ožžot sosiálaveahki geatnegahttojuvvojit searvat doaimmaide

Ráđđehus árvala ođđajagimánu 1.b.2017 rájes geatnegahttit vuollel 30 jahkásaš nuoraid geat ožžot sosiálaveahki searvat iešguhtetlágán doaimmaide. 

– Lea erenoamáš dehálaš oažžut nuoraid eret passiivvalaš eallimis eanet ulbmillaš doaimmaide, cealká bargo- ja sosiálaministtar Anniken Hauglie. 

Láhkamearriduvvon doaibmangeatnegasvuođa ulbmil lea buoridit ovttaskas olbmo vejolašvuođaid searvat doaimmaide ja iežas ealihit.

Gielddat geat juo bidjet diekkár gáibádusaid, sáhttet čájehit buriid bohtosiid. Dat guoská erenoamážit nuorra vuostáiváldiide. Gáibádusat eai guoskka doarjjavuostáiváldiide geat eai nagot searvat heivehuvvon doaimmaide, dahje eai sáhte searvat duođalaš ákkaid geažil. 

Dorvoohccit galggašedje johtileappot searvat bargoeallimii

Ráđđehus árvala juolludit 13 miljovnna kruvnnu doaimmaide oččodit dorvoohcciid geain lea jearahuvvon gelbbolašvuohta johtileappot searvat bargomárkanii. Ráđđehus árvala maid 10 miljovnna kruvnnu Bargo- ja čálgoetáhtii vai dorvoohcciid vuostáiváldinbáikkit sáhttet fállat fidnobagadallama.

– Ráđđehus áiggošii dan ahte dorvoohccit johtileappot servet bargoeallimii ja nu sáhttet iežaset ealihit. Buorre fidnobagadallan ja dat ahte sii besset johtilit bargoeallimii geain lea dohkálaš gelbbolašvuohta, lea hirbmat dehálaš, dadjá bargo- ja sosiálaministtar Anniken Hauglie. 

Guovddáš áššit johtilis bargoeallima searvamis lea gelbbolašvuođakárten, fidnobagadallan ja johtilis bargohárjehallan ja nu lea ge dárbu lasihit bálkádoarjaga ja dárogieloahpahusa.