Nanne NAV árjabidjama nuoraide

Ráđđehus nanne árjabidjama nuorra bargguhemiide 32,5 ođđa miljovnnain.

– Vaikko bargomárkana dilli buorrána, de ferte bisuhit doaimmaid vai nuorat eai geava olggobeallai. Nuorat miehtá riikka galget nu jođánit go vejolaš oažžut dan veahki maid dárbbašit ollašuhttit oahpu dahje oažžut barggu, dadjá bargo- ja sosiálaministtar Anniken Hauglie. 

Ođđajagimánu 1.b. 2017 fápmuibođii Bargo- ja čálgoetáhta ođđa Árjabidjan nuoraide. Vuos ožžo hearkkimus fylkkat Mátta- ja Oarje-Norggas. Juolluduvvui 30 miljovnna kruvnna nuoraidárjabidjamii 2017 salderejuvvon bušeahtas čuovvoleapmái ja bargomárkandoaibmabijuide. Dál bidjet árjjaid maiddái muđui riikii. Ráđđehus evttoha reviderejuvvon nationálabušeahtas ahte Árjabidjan nuoraide nannejuvvo lasi 32,5 miljovnna kruvnnain NAV čuovvolanresurssaide. 

Nannejuvvon čuovvoleapmi

Ruđat galget geavahuvvot riikaviidosaččat hukset NAV kapasitehta čuovvolit nuoraid, geat gávcci vahku bargguhisvuođa maŋŋá eai leat barggus, oahpus dahje eará jierpmálaš doaimmas. Ruđat bohtet lassin dasa maid Bargo- ja čálgoetáhta jo geavaha dán vuoruhuvvon jovkui. 

Nannet gelbbolašvuođa

– Dálá bargguhis nuoraid gaskkas leat muhtumat geain ii leat gelbbolašvuohta mii gáibiduvvo oažžut barggut. Go lea dárbu gealbonannendoaibmabijuide, de lea dehálaš árvvoštallat geavahit bargomárkanoahpahallama ja guovttejahkásaš fidnoguvllot oahpahallanfálaldaga, dadjá stáhtaráđđi.