Telefonságastallan Theresa Mayiin

Stáhtaministtar Erna Solberg ságastalai odne iežas brihttalaš stáhtaministtarkollegain, Theresa Mayiin. Ságastallama fáddán ledje earret eará Brexit ja Norgga ja Stuorra-Británnia bilaterála oktavuohta Brexit maŋŋá.

– Lea menddo árrat konkluderet mo brihttalaččat áigot organiseret iežaset boahttevaš oktavuođa EU:i. Mii leat ovttaoaivilis das ahte doalahit buori oktavuođa ovddos guvlui vai sihkkarastit bures doaibmi čovdosiid sihke bilaterálalaččat ja sismárkana ektui. Lea dehálaš midjiide sihkkarastit norgga beroštumiid dán proseassas, dadjá Solberg.

Dát guokte stáhtaministara leigga maiddái ovttaoaivilis das ahte bisuhit Norgga ja Stuorra-Británnia lagaš ovttasbarggu suodjalus- ja sihkkarvuođapolitihkas, ja terrora ja veahkaválddálaš ekstremismma dáistaleami vuostá.