Doaibmabijut pandemiija oktavuođas olbmuide geain leat doaibmahedjoneamit

Bargojoavku lea dál buktán raportta.

– Mun lean ilus go raporttas leat konkrehta doaibmabijut movt unnidit pandemiija váikkuhusaid olbmuide geain leat doaibmahedjoneamit ja sin oapmahaččaide.

Buoridan dihte fálaldaga jođánit, de lean sihtan Dearvvašvuođadirektoráhta ođas­mahttit iežaset fágalaš ráđi, sáddet reivve riikka suohkaniidda ja stáhta­háldda­šeddjiide ja čađahit webinára njoammunsuodjalusa birra, ja daid olbmuid geain leat doaibmahedjoneamit, vuoigatvuođaid birra, dadjá dearvvašvuođa- ja fuolahus­ministtar Bent Høie.

Bargojoavkkus lea leamašan Dearvvašvuođadirektoráhtta, Bufdir, Oahpahus­direktoráhtta, Funksjonshemmedes fellesorganisasjon, SAFO (doaibmahedjonemiid organisašuvnnaid ovttasbargoforuma), Unge funksjonshemmede, Mental helse, Pårørendealliansen ja Nasjonalforeningen for folkehelsen.

Dovdet isolašuvnna
Koronapandemiija vuolde leat olu olbmot geain leat doaibmahedjoneamit vásihan sosiála isolašuvnna, aktonasvuođa ja ahte lea váddáset olahit suohkanlaš dearvvaš­vuođa- ja fuolahusbálvalusaid, spesiáladearvvašvuođabálvalusaid, skuvla- ja oahpahus­fálaldagaid, astoáiggefálaldagaid ja bargguid.

Bufdir kártenraporta (2020) dásseárvováikkuhusaid birra olbmuide geain leat doaibmahedjoneamit koronapandemiija vuolde čájeha ahte leat iešguđetlágan oanehisáigge- ja guhkesáiggeváikkuhusat guhkesáiggi isolašuvnnas ja go lea unnán oktavuohta earáiguin, seammás go oapmahaččat šaddet eanet doaimmahit fuolahus­bargguid. Vel dakkár áigodagain nai go servodat lea veahážiid mielde rahpasan, de raportere Bufdir ahte ovdánahttin oppalaččat lea mannán njozet, ja muhtin áššiid dáfus njozet olbmuid hárrái geain leat doaibmahedjoneamit.

Heajut dearvvašvuohta
Dearvvašvuođabearráigeahčču dieđiha ahte leat eanas geavaheaddjit geat dárbbašit oktilis bálvalusaid geat raporterejit ahte sii leat ožžon unnit bálvalusaid pandemiija vuolde, ja ahte sin dearvvašvuohta lea hedjonan. Dasa lassin dieđihuvvo ahte leat dán joavkku oapmahaččat geat leat šaddan eanet bargat pandemiija vuolde.

Dainna duogážiin lea Dearvvašvuođa- ja fuolahusdepartemeanta bivdán Dearvvašvuođadirektoráhta:

1. árvvoštallat eanet ulbmillaš oppalaš doaibmabijuid hearkkes joavkkuid váras, ja vejolaččat ođđa doaibmabijuid olbmuide geain leat doaibmabijut.
   
   
2. árvvoštallat Dearvvašvuođa- ja fuolahusdepartemeantta ávžžuhusaid Bufdir-raporttas ja man muddui dat berrejit čađahuvvot, seammás mat vejolaš čađaheami eavttut leat, nu go ekonomalaš ja hálddahuslaš.