Historjjálaš arkiiva

UiT – Norgga árktalaš universitehta ja Sámi allaskuvla ožžot ruđaid buoret kvalitehtii ja lagat ovttasbargui

Historjjálaš arkiiva

Almmustahttináigodat Solberga ráđđehus

Almmustahtti: Máhttodepartemeanta

Romssa Universitehta – Norgga árktalaš universitehta (UiT) oažžu 15 milj. kruvnna nannet kvalitehta. Dasa lassin ožžot UiT – Norgga árktalaš universitehta ja Sámi allaskuvla (SA) 7 miljovnna kruvnna maid galget geavahit ovttasbargat hálddahuslaš funkšuvnnain ja IKT:in.

– Áhkánjárgga allaskuvlla, Hársttaid allaskuvla, ja UiT – Norgga árktalaš universitehta šadde oktan universitehtan 2016:s. Dákkár ovttastupmi addá olu vejolašvuođaid, muhto dat gáibida maiddái resurssaid. Danne juolluda ráđđehus lassiruđaid UiT:i – Norgga árktalaš universitehtii, dadjá dutkan- ja alitoahppoministtar Iselin Nybø (G).

Strukturođastus mielddisbuvttii ahte Norggas geahpededje 33 stáhtalaš universitehta ja allaskuvlla 21:n. Dát lea stuorra ođastus mii lea mielddisbuktán unnit, muhto nannosat ásahusaid. Ráđđehus lea olu gerddiid juolludan ruđaid mat mannet ovttasbargui, bargojuhkui, konsentrašuvdnii ja ovttastahttimii (SAKS) nannet universitehta- ja allaskuvlasuorggi kvalitehtaovdáneami.

 

Ovttasbargu gaskal UiT ja SA
Dán SAKS-barggu oassin ožžot UiT – Norgga árktalaš universitehta ja Sámi allaskuvla 7 miljovnna kruvnna maid galget geavahit ovttasbargat hálddahuslaš funkšuvnnain ja IKT:in.

– Mii háliidat lagat ja viidát ovttasbarggu UiT – Norgga árktalaš universitehtii ja SA:i, ja dat lea sivvan ahte ožžot ruđaid, dadjá Nybø.

Dasa lassin oažžu Norgga árktalaš studeantaovttastus ja Sis-Finnmárkku studeanttaid ovttastus ovtta miljovnna kruvnna maid galget geavahit čielggadit lagat ovttasbarggu dien guovtti studeantaovttastussii.