Spiehkastat govdunliivva geatnegasvuođas

Falástallit sáhttet ain gilvvohallat fatnasiin almmá atnimis govdunliiva. Maiddái sii geat láigohit fatnasiid suhkamis smávit jávrriin eaige dárbbaš atnit govdunliiva.

– Falástallit geat leat mielde falástallandoaimmain serviid bakte dahje falástallangilvvuin eai dárbbaš atnit govdunliivva jus šaddá váttisin falástallat dahje ahte dat čielgasit lea dárbbašmeahttun. Lassin dása go láigoha muorrafatnasiid dahje suhkanfatnasiid bálvaluvvon fanasláigohagas suhkamis fávlái smávit jávrriin, de eai dárbbaš atnit govdunliiva, dadjá ealáhusministtar Monica Mæland.

Stuorradiggi mearridii 2015 cuoŋománu 7.beaivvi lága mii geatnegahttá atnimis govdunliiva vuolil gávcci mehter guhkkosaš fatnasiin. Láhkagohčus guoská buohkaide geat čuččot fanasdeahka alde go fanas lea jođus. Láhkarievdadus lea fámus 2015 miessemánu 1.beaivvi rájes. Láhkaásahus lea fámus seamma beaivvi rájes.

– Suodjegahpira ja refleaksa ii leat geatnegahtton atnit, muhto eatnasat daid atnet go dat lea jierpmas dahku. Ráđđehus ii lean álggos gearggus mearridit govdunliiva gohččosa. Muhto Stuorradikki eanetlohku lei eará oainnus, dadjá Mæland.

Duogáš spiehkastemiide lea go sihkarvuohta dáid diliin lea doarvái bures vuhtiiváldojuvvon.

– Falástallama ektui,  de falástallanlihtut buoremusat sáhttet njuolggadusaid bakte mearridit mii lea hárjehallan ja mii lea falástallansearviid gilvvohallan, dadjá Mæland.

Go leat bálvaluvvon fanasláigohagat de lea mearriduvvon ahte láigolaš ii oaččo suhkat guhkkelii go 500 mehtera gáttis fávlli guvlui. Dán guhkkodagas sáhttá fanasláigoheaddji bearráigeahččat fatnasiid ja suhkkiid.

Oanehis áiggi dihte das rájes go láhka mearriduvvui dassážii go fápmuiboahtá, de ii leat obage leamašan vejolašvuohta sáddet láhkaásahusa gulaskuddamii. Ealáhus- ja guolástusdepartemeanta áigu baicca árvvoštallat láhkaásahusa maŋŋil jagi 2015 fanasáigodaga. Dan oktavuođas besset guoskevaš oasálaččat ovddidit iežaset oaiviliid láhkaásahussii, ja movt spiehkastagat doibmet áigumuša mielde.