Vejolašvuohta bivdit 5 000 tonna makrealla Davvi-Norggas

- Makreallabivdu davvin galgá lasihit ealáhusdoaimmaid mearas ja nannámis, cealká guolástusministtar Elisabeth Aspaker.

- Makreallabivdu davvin galgá lasihit ealáhusdoaimmaid mearas ja nannámis, cealká guolástusministtar Elisabeth Aspaker.

Daid maŋimuš gesiid lea makrealla hirbmadit leavvan Davvi-Norgii. Dat fas fuolastuhttá sihke guolásteddjiid ja dutkiid,  go diehtá movt dat váikkuha negatiivvalaččat sallit- ja sáidehivvodahkii. 

-Go ná ollu makrealla gávdno davvinorgga riddoguovlluin de min mielas livčče buoremus álggahit gánnáhahtti guollebivddu geassemánuid. Dán rádjái lea leamaš uhccán beroštupmi makreallabivdui davvin gustojeaddji rámmaid geažil. Dál go makrealla leavvá davás de lea dehálaš ahte dat bivdojuvvo, maiddái dan sivas go ferte vuhtiiváldit dán guovllu eará guollešlájaid. Mun jáhkán ahte ođđa 5000 tonna sturrosaš makreallaearri Davvi-Norgii giktalivčče guolásteddjiid eanet bivdit, dadjá Elisabeth Aspaker.  

Norga juogada makreallahivvodaga golmmain earáin ja makrealla juogadeapmi lea muddejuvvon sierra earrešiehtadusas. Áššái gulli bealit eai leat daid maŋimuš jagiid soahpan oktasaš makreallašiehtadusa.  Danne lea jahkái 2014 mearriduvvon gaskaboddosaš makreallaearri Norgii (150 000 tonna) vai lea vejolaš bivdit makrealla dassá go loahppasoahpamuš mearriduvvo.

Guolástus- ja riddodepartemeanta lea Láhkaásahusas movt muddet makreallabivddu Davvi-Norggas  mearridan 5000 tonna sturrosaš makreallaeari dán jahkái. Bienalaš dieđut ođđa ortnega birra ja searvaneavttut sáddejuvvojit gulaskuddamii árrat jagi 2014.