Háliidat čalmmustahttit soahteáiggi kulturmuittuid

Dálkkádat- ja birasministtar Tine Sundtoft ja riikaantikvára Jørn Holme ávžžuheaba reivves maid leaba sádden buot riikka sátnejođiheddjiide registreret ja gaskkustit 2.máilmmesoađi kulturmuittuid. Sivvan dasa lea ahte dán jagi lea 75 jagi dan rájes go 2.máilmmisoahti álggii Norggas ja 70 jagi go riika fas leai friddja.

-Lea dehálaš gáhttet ja suodjalit daid huksehusaid ja viesuid mat vel gávdnojit, ja áinnas kulturmuittuid soahteáiggis ja eará duođalaš dáhpáhusain, cealká dálkkádat- ja birasministtar Tine Sundtoft.

2.máilmmisoahti gaskkustuvvo viidát oahpahusa, girjjiid ja kulturvásáhusaid bokte, omd. NRK drámáráidu Kampen om tungvannet. Muhto ii goassige leat čađahuvvon riikaviidosaš kulturmuitoregistreren maŋŋil soađi. Go dákkár dieđuid ii čohkke, de sáhttet ollu fysalaš soahtemuittut jávkat.  

Dan vuođul bovdeba Dálkkádat- ja birasministtar ja Riikaantikvára buot riikka gielddaid ovttasbarggu bokte registreret, gaskkustit ja čalmmustahttit soahteáiggi kulturmuittuid dán jagi.

-Mihttomearri lea ahte mii ovttas galgat čohkket dieđuid mat vel gávdnojit 2.máilmmisoađi birra. Go gielddat registrerejit dáid kulturmuittuid, de sihkkarastit ahte materiálalaš historjá duođaštuvvo ja čalmmustuvvo, ja ahte soahteáiggi muitalusat čadnojuvvojit dihto kulturmuittuide, dadjá Sundtoft.

Ollu gielddat ja fylkkagielddat leat juo bargagoahtán dáinna temáin. Dat movttiidahttá ollugiid, sihke museasuorggi, máhttobirrasiid ja eaktodáhtolaš joavkkuid ja servviid.

-Mun doaivvun ahte gielddat váldet oktavuođa ja bovdejit aktevrraid ovttasbargui. Sii geat leat vásihan soađi leat dál boarásmuvvagoahtán ja muhtumat eai leat šat min searvvis, ja dat lea hirbmat dehálaš ahte historjját mat eai leat vel muitaluvvon almmuhuvvojit. Soahteáiggi kulturmuittuid čohkkenbargu sáhttá váikkuhit min identitehtii, sihke báikkálaččat ja nationálalaččat. Mun háliidivččen ahte ollugat servet prošektii, loahpaha Tine Sundtoft.