Sámi ja minoritehtapolitihkalaš ossodat

Sámi- ja minoritehtapolitihkalaš ossodagas (SAMI) lea bajit ovddasvástádus hábmet ja oktiiordnet stáhta politihka sámi álbmoga ja nationála unnitloguid guovdu.

Sámi- ja minoritehtapolitihkalaš ossodagas (SAMI) lea bajit ovddasvástádus hábmet ja oktiiordnet stáhta politihka sámi álbmoga ja nationála unnitloguid guovdu.

Sámepolitihka ovddideami ja oktiiordnema ovddasvástádussii gullá láhčit dilálašvuođaid nu ahte sámit sáhttet ovddidit ja nannet iežaset kultuvrra, giela ja ealáhus- ja servodateallima. Sámediggi lea sámiid ovddasteaddji álbmotválljen orgána. Sámi- ja minoritehtapolitihkalaš ossodagas lea Sámedikki bušeahta ja hálddahuslaš ovddavástádus guovddášhálddahusas, ja fuolaha ahte lea oktavuohta ja gulahallan gaskal ráđđehusa ja Sámedikki. Ossodagas lea fágalaš, hálddahuslaš ja bušeahta oktiiordnenovddasvástádus eará departemeanttaid ektui. Ossodagas lea maiddái ovddasvástádus váikkuhit ahte riikkaidgaskasaš álgoálbmotpolitihkka ovdána ja das lea ovddasvástádus oktiiordnet sámi áššiid davviriikkalaš dásis. 

Ossodagas lea maiddái ovddasvástádus ovdánahttit ja oktiiordnet stáhta politihka nationála unnitloguid ektui, mii mearkkaša daid joavkkuid ektui main guhká jo lea leamaš gullevašvuohta Norgii, nu movt juvddálaččaid, kvenaid, romálbmoga (sigøynar), romániálbmoga (táhterat) ja vuovdeláttániid ektui. Ossodat hálddaša vuođđodoarjaga ja prošeaktadoarjaga organisašuvnnaide maid leat vuođđuduvvon dáid joavkkuid vuođul, ja ossodagas leat bargamušat oktiiordnet áššiid ovttas eará departemeanttaiguin.

Earret ovddasvástádus mii ossodagas lea Sámedikki ektui, lea ossodagas maiddái ovddasvástádus guovtti unnit vuollásaš ásahusain: Álgoálbmotvuoigatvuođaid gelbbolašvuođaguovddážis ja Boazodoalu riikkaidgaskasaš fága- ja gaskkustanguovddážis.