Doarjja báikkálaš valáštallanservviide

2000 dahkkojuvvon váldojuogu rájes lea Kulturdepartemeanttas leamaš doarjjaortnet vuosttažettiin báikkálaš servviid várás, mat lágidit valáštallandoaimmaid ja fysalaš aktivitehtaid mánáide ja nuoraide.

Ortnet ásahuvvui dan oktavuođas, go Stuorradiggi meannudii St.dieđ.nr. 27 (1996 - 1997) Om statens forhold til frivillige organisasjoner (Stáhta gaskavuohta eaktodáhtolaš organisašuvnnaiguin) ja St.dieđ.nr. 44 (1997 - 1998), mii lea namuhuvvon dieđáhusa lassidieđáhus.

Doarjjaortnega ulbmil lea ovddidit aktivitehta ja searvama miellahttovuđot servviide, mat lágidit mánáide ja nuoraide valáštallamiid ja fysihkalaš aktivitehtaid. Doarjja juolluduvvo servviid váldodoaimmaide. Ortnega ulbmilin lea dasto maid doarjut servviid eaktodáhtolaš barggu. Juohkima oktavuođas galgá fuolahit dásseárvobeliin, ja ahte dakkár olbmot  vuhtiiváldojit, geain leat erenoamáš dárbbut (omd. doaibmavádjegat).

Kulturdepartemeanta lea láhčán dili nu ahte doarjjaortnet galgá hábmejuvvot dakkárin, ahte dat ii mielddisbuvtte stuorra hálddahuslaš čuovvumušaid vuostáiváldiide.

Valáštallanráđit leat ožžon ovddasvástádusa juohkit ruđaid iežaset gieldda valáštallanservviide. Gieldda 6-19 -jahkásaš ássiid lohku mearrida man ollu doarjaga valáštallanráđit besset juohkit. Valáštallanráđit galget juohkimis čuovvut departemeantta oppalaš njuolggadusaid ja váldit vuhtii báikkálaš dárbbuid. Norgga valáštallanlihttu ja olympialaš ja paralympialaš komitea (NFL) sáhttá dasa lassin árvalit mo ruđaid sáhtášii juohkit.

Doarjaga juohkin báikkálaš servviide

Valáštallanráđit dat juogadit ruđa iežaset gieldda servviide. Juohkimis valáštallanráđit galget čuovvut departemeantta oppalaš njuolggadusaid (maid gávnnat dás vuollelis) ja váldit vuhtii báikkálaš dárbbuid.

Juohkimis valáštallanráđit galget čuovvut dáid njuolggadusaid:

  1. Doarjaga galgá juohkit dušše servviide, maid vuođđoulbmil lea valáštallan ja fysalaš aktivitehta, ja mat lágidit valáštallandoaimmaid mánáide ja/dahje nuoraide.
  2. Searvvit, mat ožžot doarjaga, galget ieža oamastit searvvi ja galget leat sorjjasmeahttumat, ja dain galget leat dušše persovnnalaš miellahtut.
  3. Buot servviin, mat devdet bajábeale eavttuid, ja mat leat Norgga valáštallanlihtu ja olympialaš ja paralympialaš komitea lahtut, lea vuoigatvuohta doarjagii. Valáštallanráđit galget dasa lassin árvvoštallat galgetgo dat juolludit doarjaga eará servviide, mat devdet čuoggáid a) ja b) eavttuid.
  4. Ruđaid galgá geavahit sihke mánáid ja nuoraid doaimmaide. Valáštallanráđđi galgá sihkkarastit, ahte unnimusat 1/3 ruđain geavahuvvo goappáge ulbmiljovkui.
  5. Doarjjaruđaid galgá ollásit juolludit ja máksit servviide. Ruđaid ii galgga geavahit ortnega hálddašeapmái, iige doaimmaide, maid valáštallanráđit lágidit.

Ruđaid juogedettiin galgá váldit vuhtii dásseárvvu ja dakkár olbmuid, geain leat erenoamáš dárbbut (omd. doaibmavádjegiid).

 Ortnega doarjja ii galgga leat vuođđun dienasvuđot oamastanhámiide, iige dan galgga sáhttit rievdadit priváhta eaiggádiid dienasin.

Doarjagiid juogadeapmi suohkaniid mielde.