Departemeantta birra

Gonagaslaš Olgoriikadepartemeanttas, mii ásahuvvui 1905, leat 10 ossodaga ja gieđahallá áššiid mat gusket Norgga gaskavuhtii nuppiid riikkaide, riikkaidgaskasaš organisašuvnnaide, olgoriikagávpái, kultuvrralaš oktavuođaide olgoriikii ja Norgga gaskavuhtii bázahallan riikkaide.

Olgoriikaministara ovddasvástádus lea lágidit, oktiiordnet ja čađahit Norgga olgoriikapolitihka. Ovddidanministara ovddasvástádus lea veahkkepolitihkalaš bargu ja ovddidanbargu OSSE-guovllus. Dat mearkkaša ahte olgoriikaministara ovddasvástádus lea máilmmiviidosaš bargu oaččohit áigálii ráfi, soabadeami ja demokratiijaovddideami, dása gullá maiddái Gaskanuortta ráfiproseassa. Dasto lea olgoriikaministara ovddasvástádus buot Norgga humanitára veahkki, heahteveahkki ja veahkki báhtareaddjiide, ja vel oanehisáiggi ja guhkesáiggi doaibmabijut OSSE-guovllus. Ovddidanministara ovddasvástádus lea buot eará oanehisáiggi ja guhkesáiggi veahkeheapmi OSSE-guovllu olggobealde, omd. veahkki Gaskanurtii, Gaska-Amerihkkái ja eará ráfehis guovlluide.

Ámmátdásis jođiha olgoriikaráđđi departemeantta, ja ovddasvástádus politihkalaš njunušgoddái ja nuppe guvlui manná su bokte. Olgoriikaráđi ja ossodatjođiheaddjiid gaskkas leat golbma veahkkeolgoriikaráđi. Olgoriikaráđđi, golbma veahkkeolgoriikaráđi ja vel Hálddašanossodaga ekspedišuvdnahoavda leat departemeantta njunušgoddi ámmátdásis.

Fágadepartemeantan Olgoriikadepartemeanta lea olgoriikapolitihkalaš áššiid, olgoriikaekonomalaš gažaldagaid ja olgoriikaveahkkeáššiid áššeráhkkanahttin- ja doaimmahanorgána. Olgoriikadepartemeanttas lea maiddái dehálaš oktiiordnen- ja ráđđeaddindoaibma eará departemeanttaid ektui, go Olgoriikaministaris dat lea ovddasvástádus lágidit, oktiiordnet ja čađahit Norgga olgoriikapolitihka. 

Olgoriikabálvalus galgá fuolahit ja ovddidit Norgga beroštumiid olgoriikka ektui ja veahkehit norgalaččaid ráđiiguin, veahkehemiin ja suodjalemiin olgoriikkalaš eiseválddiid, olgoriikalaččaid ja olgoriikkalaš ásahusaid ektui. Olgoriikabálvalusa bargamušaid fuolahit olgoriikastašuvnnat ja Olgoriikadepartemeanta, mii goziha olgoriikabálvalusa doaimma. Olgoriikastašuvdna sáhttá leat ambasáda, legašuvdna, konsulára stašuvdna, bistevaš sáttagoddi dahje eará olgoriikaorgána.