Gielda- ja guovlodepartemeanta evttoha nuppástusaid sámeláhkii § 2-6 čuovvolan dihte Sámedikki evttohusa, man mielde sámi jienastuslohku galggašii buorebut fievrriduvvot. Evttohus sáddejuvvo dál gulaskuddamii buot suohkaniidda, sámi organisašuvnnaide, departemeanttaide ja guoskevaš institušuvnnaide nugo Sámediggái ja Álbmotlogaheami guovddáškantuvrii.

- Dát evttohus mielddisbuktá mearkkašahtti buoridemiid ja álkidahttimiid. Dat máksá ahte iešguđege suohkan ii šat dárbbaš fievrridit ja hálddašit sierra sámi jienastuslogu iežas suohkanis. Sámediggi oažžu ovddasvástádusa oktasaš jienastuslogu fievrrideamis ja das ahte jienastuslohku fievrriduvvo suohkaniid mielde, ja maiddái jienastuslogu kvaliteahttasihkkarastimis, dadjá Gielda- ja guovlodepartemeantta stáhtačálli Anders J. H. Eira.

Evttohusa mielde galgá olmmoš, gii dáhttu čálihuvvat sámi jienastuslohkui, gáibidit dan Sámedikkis. Suohkanat mat ožžot dákkár gáibádusaid, berrejit oktilaččat sáddet daid Sámediggái. Sámediggi, ovttasbarggus Álbmotlogaheami guovddáškantuvrrain, logaha dáid guovddášlaš álbmotregistarii ja fuolaha ahte suohkanat ožžot ođasmahttojuvvon ja loahpalaš jienastuslogu sámediggeválggaide.